Kuri ubu mu Karere ka Kamonyi hari guhugurirwa abahinzi 100, kuri gahunda yo kuhira hakoreshejwe imirasire y’izuba, guhinga kijyambere ku mirongo no gukoresha amafumbire mvaruganda n’imborera, ndetse no gutera imbuto y’indobanura.

Ibyo birimo gukorwa muri gahunda y’ubuhinzi butangiza ibidukikije, aho Leta yunganira uwakoze umushinga wo kuhira akoresheje imirasire y’izuba, ku giciro gito ugereranyije n’abakoresha moteri zikoresha ibikomoka kuri peteroli.

Umuyobozi w’ishami ry’ubuhinzi mu Karere ka Kamonyi, Mukiza Justin, avuga ko ubuhinzi bubungabunga ibidukikije, burimo gukoresha ingufu z’imirasire y’izuba, kuko moteri zindi zisohora imyuka ihumanya ikirere, ari na yo mpamvu bahisemo gutangira guhugura abahinzi, babagaragariza ibyiza byo gukoresha izo ngufu.

Agira ati “Ku ikubitiro twahereye ku mushinga wo kuhira kuri hegitari eshanu ku mushinga wa Miliyoni 40Frw, tugamije kwereka abatuye Akarere ka Kamonyi ko kuhira ku buso buhagije bishoboka, ubu buryo dukoresha ntibuhumanya ikirere mu gihe moteri zisanzwe zo zihumanya ikirere”.

Mukiza avuga ko n’ubwo hari abavuga ko gukoresha imirasire y’izuba bihenda, atari byo kubera ko Leta itanga nkunganire ya 75% by’ikiguzi, naho abahinzi bakishyura gusa 25%, mu gihe abakoresha moteri ya mazutu bo bunganirwa kugeza gusa kuri 50%, abahinzi bakiyishyurira asigaye.

Umuyobozi Nshingwabikorwa w’Umuryango (RDIS), Ntarindwa Viateur, avuga ko bafite gahunda yo kongeraho abandi 100 bose hamwe bakaba 200, bagahabwa ubumenyi ku buhinzi butangiza ibidukikije bakoresha imirasire y’izuba mu kuhira, no gufata neza ubutaka kugira ngo barusheho kongera umusaruro.

Avuga ko ubuhinzi buhindura icyerecyezo buganisha ku bukire, busaba igishoro kandi ko Leta n’abafatanyabikorwa mu buhinzi, biyemeje kuba hafi abifuza gukora ubuhinzi bw’umwuga, bityo ko abahinzi bakwiye kumva ko batahingira gusa inda, ahubwo babigira ishoramari rigamije inyungu.

Agira ati “Ibyo bisaba ko Abanyarwanda batekereza gukora ubuhinzi bw’umwuga, kuko ubuhinzi si izina umuntu ahabwa. Turashishikariza abahinzi kuba abanyamwuga, bakishyira hamwe bakabona nkunganire ya Leta, kuko nibwo byaborohera kubona ikoranabuhanga ryo gukoresha imirasire y’izuba”.

Bamwe mu bahawe amahugurwa bagaragaza ko hari byinshi bigiye ku buhinzi bububangabunga ibidukikije, harimo kwirinda ubuhaname bw’imikingo mu mirima yabo, gutera imbuto y’indobanure no kuhira hakoreshejwe ikoranabuhanga ryifashissha ingufu z’imirasire y’izuba, bakaba bizera ko nibagera iwabo bizabafasha kongera koko umusaruro.

Mu bindi abahinzi bahuguweho hari ukubyaza umusaruro ubutaka buto, mu rwego rwo kongera umusaruro, kuko byagaragaye ko usanga mu mirima y’abantu hahinze igice kimwe ikindi kidahinze kubera umuco wo guhingira kurya gusa.