Abaturage bishyize hamwe, ngo bashobora gukodesha imashini zihinga bakagura n’utumashini twuhira ku giciro kitabavunnye.

Abaturage benshi barimo n’abatazi uko izo mashini zigura cyangwa ibiciro byo kuzikodesha, ngo iyo bazibonye n’akazi zikora, bahita batekereza ko zihenze batanazishoboza mu gihe ngo bishyize hamwe byaborohera.

Hagati mu cyumweru dosoza, abakozi b’ikigo RAB beretse abahinga mu gishanga cya Ruvungirana kiri hagati y’imirenge ya Rusatira, Ruhashya (muri Huye) na Save (muri Gisagara) uburyo bwo guhinga hifashishijwe imashini no kuhira hifashishijwe ikoranabuhanga.

Bamwe mu baturage bitabiriye iki gikorwa, bo bakavuga ko ari byiza ariko kubyigezaho bigoye.

Karamage Dismas w’i Muhororo mu Murenge wa Ruhashya, yitegereza utumashini tumisha amazi ku ruhande rumwe, yahindukira akareba aho imashini zihinga zinasanza, ati “Barabitwereka tubirebe dutahe, ariko twe ntitwabyigezaho kuko bihenze.”

Kuhira ku buso buringaniye ngo ntibisaba amafaranga menshi cyane.

Niyomugabo Thaddée yunze mu rye, agira ati “Biragaragara ko ari ibintu byiza cyane, ariko nkatwe b’abaturage kubishyikira biragoye.”

Ikibazo cy’imyumvire ngo gishobora kuba kiri ku isonga mu bituma abaturage batifashisha uburyo bugezweho bwo guhinga, kuko abenshi ngo bavuga ko izo mashini zihenda ariko batazi ibiciro byazo nta n’ubushake bwo kubimenya bafite.

Karamage utazi uko ibiciro byazo bihagaze akaba atarigera anabibaza, ati “Ubirebye, ukareba n’uko ibiciro byifashe ku isoko, ntiwabura kuvuga ko byo bihenze kurusha.”

Niyomugabo na we, ati “Njyewe nkurikije uko biri, ndabona bishobora kuba bihenze.”

Taremwa John Bosco ushinzwe gahunda yo kuhira muri RAB, avuga ko abantu bahuje imbaraga, kugera kuri iri koranabuhanga bitabagora.

Taremwa John Bosco yemeza ko ukoresheje ikoranabuhanga mu buhinzi agaruza vuba amafaranga aba yatanze kandi akanunguka.

Ati “Abantu baturanye biyegeranyije, ibihumbi 150Frw bishobora kubagurira ibikoresho byo kuhira imirima yabo ku buso buringaniye [butagera kuri ha 10].”

Akomeza agira ati “Imashini zo kurima no gusanza zikodeshwa amafaranga ibihumbi 50Frw kuri hegitari, umuhinzi akanigurira amavuta yo kuzikoresha (lisansi). Ibihumbi 20Frw mu kurima n’ibihumbi 15FRw mu gusanza. Nyamara abahingisha amaboko batwara ibihumbi birenze 100Frw.”

Anavuga ko guhinga n’imashini bituma ubutaka bubasha kubika amazi kuko yo icukura kurusha amasuka y’abantu, bityo umusaruro ukiyongera.

Ati “Abadakoresha ikoranabuhanga, kuri hegitari beza toni eshatu aho kubonamo umunani cyangwa icumi. Ku bigori, akenshi ni toni ebyiri aho kweza esheshatu cyangwa umunani. Kuri soya n’ibishyimbo, ni toni imwe aho kubona enye kugera kuri esheshatu.”

Taremwa avuga ko uhinze akoresheje ikoranabuhanga, agaruza vuba amafaranga aba yatanze kandi akanunguka.

MENYA UMWANDITSI

Marie Claire Joyeuse

Umunyamakuru

@ JoyeuseC

Reba inkuru zose nanditse ( 1557 )