Abahinzi bariruhutsa kuko imyaka beza itazongera kubaboreraho

Abahinzi bo muri Rulindo batangaza ko imihanda mishya yatashywe izabafasha kugeza umusaruro wabo ku isoko kuko mbere wabapfiraga ubusa kubera imihanda mibi.

JPEG - 80.3 kb
Ambasaderi wa EU Michael Ryan n’umunyamabanga wa Leta muri MINAGRI ubwo batahaga imihanda y’imigenderano ireshya n’ibirometero 21.8 muri Rulindo

Babitangaje ubwo bafatanyagana na Ministeri y’ubuhinzi n’ubworozi (MINAGRI) n’Umuryango w’ubumwe bw’Uburayi (EU) gutaha imihanda y’imigenderano (Feeder Roads) yakozwe mu Karere ka Rulindo, tariki ya 09 Werurwe 2017.

Iyo mihanda iri muri ako karere n’indi iri mu turere twa Ngoma, Bugesera, Muhanga, Huye, Ngororero na Rubavu yose hamwe ireshya n’ibilometero 700, yakozwe ku nkunga y’Umuryango w’ubumwe bw’Uburayi kandi yose yatashywe kuri uwo munsi.

Iyo mihanda ni iy’ibitaka ikozwe neza, yashyizwemo itaka ryabugenewe ritaba ibyondo iyo imvura iguye. Yuzuye itwaye miliyoni 40 amayero (€), mu manyarwanda abarirwa muri miliyari 35RWf.

Habumugisha Innocent utuye murenge wa Mbogo muri Rulindo, ahatashywe umuhanda w’ibilometero 21.8, avuga ko hari igihe batinyaga guhinga kubera ko bari bafite umuhanda mubi watumaga atajyana umusaruro we ku isoko. Ariko ngo ubu arasubijwe.

Agira ati “Twatinyaga guhinga kuko imyaka itabonaga abayigura ikaborera mu mirima cyangwa bakayiduhera kuri make.

Nshobora kweza ibigori biguzwe amafaranga ibihumbi 100RWf ariko nkabura ubingurira ku giciro nifuza kubera umuhanda mubi nkaba nabitangira amafaranga ibihumbi 40RWf.”

Undi muhinzi-mworozi witwa Bisamaza Prudence yororeye ingurube 700 mu murenge wa Ngoma mu karere ka Rulindo.

Afite na hegitare esheshatu z’urutoki. Ahamya ko nta kibazo azongera kugira kuko umusaruro w’ubuhinzi n’ubworozi bye azajya abijyana ku isoko abinyujije mu muhanda ukoze neza.

JPEG - 76.9 kb
Imihanda yo mu Karere ka Rulindo yatashywe izafasha abahinzi n’aborozi kugeza umusaruro ku isoko

Umunyamabanga wa Leta muri MINAGRI ahamya ko imihanda irimo guhangwa no gusanwa mu cyaro, ari igisubizo kinini cyane ku bahinzi n’aborozi.

Agira ati “Tugira ibishanga bihingwamo umuceri, ibigori, ibisheke, tugira n’imisozi ihingwaho icyayi; ibi byose biba bigomba kugezwa ku masoko cyangwa ku nganda bitarangirika.”

Akomeza avuga ko imihanda migenderano igana ku mirima ihingwamo ikenewe kubakwa, ireshya n’ibilometero 2550.

JPEG - 84.7 kb
Imihanda yatashwe ni iy’ibitaka ifasha abahinzi n’aborozi kugeza umusaruro ku isoko

Ambasaderi w’Umuryango w’Ubumwe bw’u Burayi, Michael Ryan nawe yemeza ko imihanda igana ku bahinzi n’aborozi izatuma umusaruro ubikomokaho wiyongera.

Ibitekerezo   ( 1 )

Banyarurindo mwari mwarirengagije imirimo kubera imihanda ngaho igisubizo cyaje mube abakorerahamwe mugire uruhare mu iterambere RYA rulindo no mu Rwanda hoseeee.

Ndagijimana Mupenzi yanditse ku itariki ya: 10-03-2017  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka