Ibisigazwa by’umuceri bivamo ibintu byinshi nk’amakara

Murwanashyaka Celestin umuhinzi w’umuceri muri koperative Muvumba Rice Growers ihinga mu gishanga cy’umugezi w’umuvumba icyanya cya 8, avuga ko ibisigazwa byungukira ba nyir’inganda.

Yagize ati“Aho batunganiriza umuceri hava n’ibiryo by’amatungo ikiro ni amafaranga 100, ibisigazwa byawo (Ibishishwa) bikorwamo amakara ikiro ni 100, twe batubarira umuceri gusa ntibarebe izindi nyungu nyir’uruganda akuramo.”

Yifuza ko ubutaha mu kugena ibiciro by’umuceri haziyongeraho n’ibisigazwa byawo kugira ngo umuhinzi nawe abone kuri iyo nyungu.

Vincent Munyeshyaka Minisitiri w’ubucuruzi n’inganda avuga ko icyo kibazo koko gikwiye kuzaganirwaho mu kugena ibiciro kuko bigaragara ko abahinzi bahendwa.

Ati “Ubundi mbere abahinzi na bo ntibari bazi agaciro k’ibyo bintu ariko koko ni ikibazo, ubutaha muzazane icyo cyifuzo mubizaganirwaho na cyo kibemo kandi ndizera ko bizatanga igisubizo cyiza.”

Igihembwe cy’ihinga gishize, igiciro cy’umuceri mugufi nticyagombaga kurenga amafaranga 290 naho umuremure amafaranga 300 ku kiro.

Icyo kibazo kimwe n’ibindi ni ibyabajijwe Minisitiri w’intebe ubwo yasuraga abahinzi bakoresha uburyo bwo kuhira mu kibaya cya Kagitumba bahinga ibigori na Soya ku buso bwa hegitari 900 n’abahinzi b’umuceri mu cyanya cya 8 ku buso bwa hegitari 1750 ku wa 27 Ugushyingo 2017.

Abahinzi b’ibigori bo bagaragarije Minisitiri w’intebe ikibazo cy’isoko rito ry’umusaruro wabo kuko ngo bituma rimwe na rimwe ugurishwa mu gihugu cya Uganda.

Bizejwe ko umusaruro w’ubutaha bazahuzwa n’inganda zikorera i Kigali zikaba ari zo zigirana amasezerano na bo harimo gutwara ibigori byatonowe.

MENYA UMWANDITSI

Emmanuel Gasana Sebasaza

Umunyamakuru

@ SEBASAZAGEmman1

Reba inkuru zose nanditse ( 1817 )