Volleyball: Ikipe y’u Rwanda U17 yabonye itike yo kuzakina igikombe cy’isi
|
Yanditswe ku itariki ya: 27-01-2013 - Saa: 10:26'
|
|
Ibitekerezo
(
1
)
|
|
|
|
Nyuma yo kwegukana umwanya wa gatatu mu mikino y’igikombe cya Afurika cy’abatarengeje imyaka 17 yasojwe ku wa gatanu tariki 25/01/2013, ikipe y’u Rwanda yahise ibone itike yo kuzakina igikombe cy’isi kizabera muri Mexique.
Muri iri rushanwa ryari ryitabiriwe n’amakipe ane harimo u Rwanda, Algeria, Misiri na Tuniziya, amakipe yose yagombaga guhura hagati yayo, maze agakurikiranywa bitewe n’uko yarushanyijwe amanota.
Ikipe y’u Rwanda yatsinze Algeria amaseti atatu ku busa, nyuma itsindwa na Tuniziya amaseti atatu kuri imwe, ikaba yarasoje itsindwa na Misiri amaseti atatu ku busa, bituma ifata umwanya wa gatatu.
Ikipe ya Misiri yatsinze imikino yose, ni yo yegukanye igikombe n’umudari wa Zahabu, ikurikirwa n’ikipe ya Tuniziya yatsinze imikino ibiri muri itatu, maze ihabwa umudari wa ‘Silver’, ikipe y’u Rwanda yabaye iya gatatu ihabwa umudari wa Bronze, naho Algeria yakiriye iyo mikino ifata umwanya wa kane ari na wo wa nyuma, kuko yatsinzwe imikino yose uko ari itatu.
Amakipe yose uko ari ane, yahise abona itike yo kuzakina igikombe cy’isi kizabera muri Mexique mu mpera z’uyu mwaka, kuko muri icyo gikombe umugabane wa Afurika uba uteganyirijwemo imyanya ine.
Amakipe yitabiriye igikombe cya Afurika cy’abatarengeje imyaka 17 muri uyu mwaka, yagize amahirwe y’uko amakipe 10 yandi yagombaga kwitabira icyo gikombe yatangaje ko atazitabira iyo mikino ku munota wa nyuma, bituma gikinirwa n’amakipe ane gusa, binatuma yose ahita abona itike y’igikombe cy’isi.
Ni ubwa mbere mu mateka y’u Rwanda, ikipe iyo ariyo yose ikina umukino wa Volleyball ikinirwa mu nzu (Indoor Volleyball) ibona umudari wa Bronze.
Biteganyijwe ko ikipe y’u Rwanda n’abayiherekeje bazagaruka mu Rwanda ku wa mbere tariki 28/01/2013, bakazagera i Kigali saa munani z’amanywa.
Theoneste Nisingizwe
|
