Abenshi bavuga ko ari wo uzitira abaturage ukababuza gutahuka ubabeshyako mu Rwanda hakiri ibibazo by’amacakubiri, nyamara abatahuka bavuga ko iyo hagageze batangazwa n’uko bakirwa bakibaza ibyo babwibwaga aho biva.

Nyirabikari Rusi umwe mu baheruka gutahuka avuga ko ibyo bihuha akenshi bikwirakwizwa n’abasize bakoze Jenoside baba banga gusigara bonyine.

Agira ati “Ba bandi basize bakoze ibibi bajyaga badutera ubwoba ngo ntawajya mu Rwanda noneho natwe tukaguma kwibaza ukuntu tuzaguma mu guhugu kitari icyacu bikatuyobera, ari na yo mpamvu twatashye twasanze ibyo batubwira ari ibinyoma.”

Olive Nyiraminani we avuga ko imibereho bari barimo yari iy’uburetwa kukobakoreshwaga imirimo yingufu n’Abanyekongo, kugira ngo babone uko babaho. Avuga ko ubuzima bwo mu mashyamba bwari bumaze kubazonga bahitamo gutahuka.

Aba Banyarwanda barakangurira abandi basize muri Congo gutahuka, kuko nta nyungu zo kuguma kwiruka inyuma y’ababashuka mu intambara z’urudaca kandi igihugu cyabo kirimo umutekano.

Haguma Ildephonse Umuyobozi w’inkambi ya Nyagatere, yakira impunzi by’agateganyo, avuga iyo aba Banyarwanda batahutse bagerageza kubakuramo ibihuka bakura muri Congo babereka umurongo igihugu kigenderaho kugira ngo nabo bakomerezeho kubaka igihugu cyabo.

Ati “Nk’abakuru barimo bavuye mu Rwanda muri 1994 iyo bari mu mashyamba ya Congo baba bafite amakuru atari ukuri ku Rwanda bitewe n’inyungu bwite z’abantu baba babafite tubabwira aho igihugu kigeze n’umusanzu tubashakaho wo kubaka igihugu.”

Aba banyarwanda batahutse ni imiryango 29 y’abantu 90, harimo abagabo babiri, abagore 27 n’abana 61, bose bahise bahabwa ubwisungane mu Kwivuza.