Bitagenze bityo ngo nta terambere u Rwanda rwagira mu gihe rugicungira mu byatumijwe mu mahanga, nk’uko yabitangarije mu kiganiro yagiranye nabo ku mugoroba wo kuri uyu wa mbere tariki 16 Gicurasi 2016.

Perezida Kagame yasabye abaturage gukoresha imbaraga kugira ngo bagabanye umusaruro batumiza hanze.

Yagize ati “Tugomba gukora cyane tukabona umusaruro mu byo dukenera byose. Igihe cyose tutabona ko ari ikibazo kuba dutumiza hanze ibyo dushobora kwikorera, nta mpinduka twageraho.”

Yavuze ko ibyo bizagerwaho ari uko abaturage bahinduye imikorere, no kutemerera ko umusaruro bakoreye ujyanwa hanze bakongera bakawugurisha Abanyarwanda ku giciro cyo hejuru.

Bamwe mu bavuga rikijyana bo muri iyi ntara bahawe umwanya babaza n’ibibazo batanga n’ibitekerezo.

Yagarutse ku kibazo cy’imyenda ya caguwa, avuga ko kuyica ari imwe mu ndangagaciro z’umuco Nyarwanda zo kutemera kwakira ibyasigajwe n’abandi.

Ati “Reka dufatanye twubake inganda zikora ibyo dukeneye. Ibi dusaba ntabwo ari ibintu bidashoboka. Birashoboka. Niba tugeze ku rwego rwo gukora mudasobwa, twananirwa gute gukora imyenda yambarwa n’Abanyarwanda?”

Bamwe mu bayobozi bakuru bari baherekeje Perezida.

Perezida Kagame yavuze kandi ko kuba amahanga ashima u Rwanda iterambere rwagezeho, bikwiye kubera Abanyarwanda isomo ryo guharanira gukomeza kugera kure no kurinda ibyagezweho.

Perezida Kagame yagiranye ibiganiro n’abavuga rikijyana bo muri iyi ntara, nyuma yo gufungura ku mugaragaro umushinga wa Kivu Watt.