Murenzi Sam avuga ko amaze kubona ko kuramya no guhimbaza Imana, bituma ubikora yegera Imana kandi akayegereza n’abandi, ngo byamuteye gufata umwanzuro wo gufasha n’abandi bose babikunda.

Sam Murenzi avuga ko kuririmbira Imana unacuranga biyikwegereza kurushaho.

Mu rwego rwo kubafasha kumenya kuririmba no gucuranga bakora umurimo w’Imana mu buryo bwa gihanga akaba yahisemo gushing ishuri rya muzika.

Murenzi usanzwe anashinzwe ibijyanye no gucuranga no kuririmba mu itorero rya Kingdom Embassy, avuga ko ari ubuntu bagiriwe, na bo bakwiye guha abandi ubumenyi butuma begera Imana kurushaho kandi bakaba bashobora no kubikoresha n’ahandi hatandukanye.

Yagize ati “Twagiriwe ubuntu bwo gukurira mu muziki turawumenya turawukora. Nifuje ko nashinga iri shuri ngo rifashe abantu bose bifuza gucuranga no kuririmbira Imana, ariko kandi hari n’abandi bifuza kugira ubumenyi kuri muzika kugira ngo bazabikoreshe ku buryo butandukanye”.

Aba ni bamwe mu banyeshuri biga umuziki.

Sam avuga ko ishuri amaze gushinga niritangira gukora neza yifuza ko yazagenda yagura aho rikorera kugira ngo bibashe kugera ku bantu benshi kandi ku buryo butabahenze.

Yagize ati “Ntabwo iri shuri kurijyamo ari ubuntu ariko buri muntu uko yishoboye n’uko yifuza kwigamo tuzajya tumufasha. Twifuza ko iki gikorwa cyazagera henshi, kuko hari benshi badafite amikoro menshi kandi bafite impano muri muzika ariko batabasha kugera aho bafashwa gutera imbere”.

Murenzi Sam ni umwe mu bahanzi bazwi cyane mu itorero rya Zion Temple mu Rwanda, mu kuririmba no kuramya Imana, akaba yarageze muri iri torero avuye muri Eglise Vivante.

Iri shuri amaze gushinga rikaba rikorera ku Mulindi aho bita i Gasogi mu Mujyi wa Kigali. Sam ni umuyobozi w’abaririmbyi mu itorero rya Kingdom Embassy, uzwi mu ndirimbo nka “Nkumbuye iwacu”, “Ninjiye mu marembo yaw mwami” n’izindi.