Ubwo abashinzwe amakoperative bose bo muri ako karere ku wa 04 Gashyantare 2016, bareberaga hamwe uburyo imihigo biyemeje ishyirwa mu bikorwa cyane cyane bahereye ku bikiri inyuma mu mihigo, bavuze ko bagomba gufata ingamba kugira ngo na byo bizamuke.

Bimwe mu byo bavuga byatumye amenshi mu makoperative adindira ku buryo amwe ageze aho gusenyuka ngo ni abanyamuryango bayo babigizemo uruhare kubera kutuzuza inshingano zabo zo gutanga imisanzu nk’uko bisobanurwa n’umuyobozi ushinzwe amakoperative mu karere Nsabayezu Jean Luc.

Yagize ati” Ni byo koko hari amakoperative yagiye agira ibibazo bijyanye no kugera ku inshingano zazo nk’iyo y’abamotari ariko iyo urebye usanga ari imyumvire y’abanyamuryango aho usanga ibyo bakora bisubiye inyuma gato wabaha inama n’umurongo bo kabakwereka ibindi ukabura uko ubyitwaramo”.

Akomeza avuga ko bafashe ingamba zifatika zo gushyira imbaraga mu makoperative yadindiye kugira ngo hagaragare impinduka.

Minani Benjamin ushinzwe iterambere ry’ishoramari mu Murenge wa Gitambi avuga ko hari byinshi bituma amakoperative adatera imbere aho abanyamuryango bayo bayajyamo bazi ko bahita babona inkunga batazibona bagahita bacika intege bamwe bagatangira kuyavamo.

Bamwe mu banyamuryango mu makoperative yadindiye bo bavuga ko abayobozi bashinzwe kubareberera ari bo babadindiza amakoperative yabo kuko bataza ngo babegere babagire inama hakiri kare ahubwo bagatangira kubegera ari uko batangiye guhura n’ibibazo .

Karangwa Felix, ukora ubumotari, yagize ati” Kugeza ubu ndasanga twebwe abanyamuryango ba koperative yacu nta kosa dufite ahubwo ni ubuyobozi butagaragaza ukuri kw’ibihombo duhura na byo aho bituruka”.

Amwe mu bakoperative yadindiye harimo iy’abamotari yari igiye kuzuza inzu y’amagorofa 3 ariko ikaba iri hafi gutezwa cyamunara, koperative y’ikusanyirizo ry’amata rya Giheke ndetse n’irya Nyakarenzo, n’izindi zitandukanye.