Abaturage byari biteganyijwe ko bakora umuganda kuri uyu munsi aharengewe n’imvura kugira ngo barebe ko hari icyo baramura.

Rubonesha Alexis Umunyamabanga Nshingwabikorwa w’Umurenge wa Mpanga avuga ko imvura yaguye ari nyinshi mu kagari ka Mpanga Umurenge wa Mpanga yangiza hafi ya hegitari y’imirima y’ibigori.

Avuga ko byatewe no kuba hari imigenda yari idasibuye neza imvura iguye amazi abura inzira ayobera mu mirima y’abaturage.

Asanga hagomba gufatirwa ingamba kugira ngo barwanye ibiza ati“ mu muganda usoza ukwezi k’Ugushyingo twiteguye kuhatunganya tugasibura rigore zose k’uburyo imvura itazongera kutwangiriza hari n’imyaka ishobora gukira iramutse yitaweho, nibyo turimo.

Yasabye abaturage kubyihanganira bafatira hamwe ingamba zo gukumira amazi yimvura akomeje kwangiza imyaka y’abo. Ingomero nazo ni izo kwitondera muri iki gihe cy’imvura

Mu gihe cyimvura ingomero zikomeje gutwara abantu, hari nk’urugomero rwa Nyamugari aho mu gitondo cyo kuwa 27/11/2015 basanze umurambo w’umuntu utaramenyekana ureremba hejuru y’amazi.

Bazimya Adrien Umunyamabanga Nshingwabikorwa w’Akagari ka Nyamugari avuga ko nyuma yo kubona umuntu wapfiriye mu rugomero rwa Nyamugari ko batabashije guhita bamumenya ngo bamenye n’umwirondoro we.

Avuga ko amakuru afite ari uko uwo mugabo yaba akomoka mu murenge wa Kigarama.

Nk’uko yabibwiwe ngo ku wa 25/11/2015 yagiye gukaraba amanutse escalier z’urwo rugomero amazi aba menshi amurusha ingufu aramutwara.

Muri iki gihe cy’imvura abantu barasabwa kwirinda kujya mu ngomero kuko amazi akomeje kwiyongera uko imvura igwa ari nyinshi.

Servilien Mutuyimana