Nyuma y’aho ubuyobozi bumanutse mu mirenge 13 igize aka karere bwasanze hari inka zagiye ziburirwa irengero zigurishwa izindi ntizigere ku bo zakagombye kugeraho.

Hakozwe raporo ya ’Gira inka’ basanga hari izagurishijwe kandi abayobozi b’inzego z’ibanze babigizemo uruhare.

Ubuyuyobize kubona amakuru ko hari bamwe mu bayobozi babigizemo uruhare, bwatangaje ko Komite Nyobozi y’Akarere igomba kuzaterana ikabafatira ibyemezo.

Umuyobozi w’Akarere ka Rutsiro Wungirije ushinzwe Imibereho Myiza y’Abaturage, Nyirabagurinzira Jacqueline, wari ukuriye komite yagenzuye izo nka, agira ati "Twamanutse hasi kureba inka za gahunda ya ‘Gira inka’, dusanga hari izagurishijwe n’izindi zatanzwe zikakwa umuturage zigahabwa undi kandi abayobozi b’imirenge n’utugari babigizemo uruhare. "

Yongeraho ko bazabafatira ibihano bitewe n’uruhare buri wese yabigizemo kuko ngo hari abashobora kwihanangirizwa mu gihe ngo hari n’abandi bazashyikirizwa ubutabera nk’abakiriye ruswa kugira ngo umuturage ahabwe inka.

Nubwo ariko abayobozi batungwa agatoki, n’abahawe inka bakazigurisha ku bwabo na bo ngo nyuma y’uko Komite Nyobozi y’Akarere iterana, na bo ngo bazigwaho hakiyongeraho abarurage bashobora kuzakwa inka bahawe bitewe n’uko ngo bayifashe nabi.

Nyuma yo kumanuka mu mirenge yose igize Akarere ka Rutsiro muri rusange kuva muri 2006 inka zatanzwe zigera ku bihumbi 4 na 961 ziyongeraho izavutse zituwe zisaga ibihumbi 2 na 347, zose hamwe zikaba 7 na 308. Muri izo izisaga 291 zaragurishijwe, 128 zirapfa naho icyenda ziribwa. Bivuze ko muri ako karere kugeza ubu hari inka zibarirwa mu 6 na 880 za “Gira inka”.

Cisse Aimable Mbarushimana