Inkuba yakubise Twahirwa Jean Pierre mwene Mbabariye na Mukangango bo mu kagari ka Rusagara ahagana mu masaha ya saa mbiri z’umugoro, ubwo hagwaga imvura y’utujojoba.

Yari yugamye ku irenmbo imbere y’urugo rw’iwabo, ari naho yamutsinze. Umurambo wa Twahirwa ukaba wahise ujyanwa mu bitaro bya Nemba.

Bisengimana Janvier, Umunyamabanga Nshingwabikorwa w’umurenge wa Gakenke, yahamije amakuru y’urupfu rwa Twahirwa.

Bisengimana akaba asaba abaturage ko muri ibi bihe imvura igiye gutangira kugwa barushaho kwirinda icyo aricyo cyose gikurura inkuba, harimo nko kwugama munsi y’igiti kandi bakarushaho kwambara inkweto mu gihe imvura irimo kugwa.

Nubwo mu murenge wa Gakenke nta muntu waherukaga gukubitwa n’inkuba, akarere ka Gakenke gakunze kwibasirwa n’inkuba. Mu mpera z’umwaka ushize wa 2014, mu murenge wa Muzo inkuba yakubise abanyeshuri barenga barindwi ariko ntibapfa. Yanahitanye umuturage umwe ndetse n’inka imwe.

Abdul Tarib