Uyu mugore w’imyaka 57 usanzwe ari umupfakazi wa Jenoside, avuga ko nyuma yo kumenya ibanga ryo kwigirira ikizere no kutisuzugura ari bwo yatangiye gutinya kwikorera. Agasaba abagore bagenzi be kugera ikirenge mu cye.

Uyu mugore utuye mu murenge wa Musha, akarere ka Gisagara, mu rugo iwe hagaragara imwe mu myaka yiyejereje, irimo ibigori n’amasaka n’ibiraro bitatu birimo inka.

Jenoside yakorewe Abatutsi mu Rwand muri mata 1994 yasize Nyiraneza ari umupfakazi inamutwara abana batanu. Byatumye asigara yumva nta bumuntu akifitemo. Avuga ko yumvaga atozongera gusubirana ibi binatuma abaho yumva ngo nta kerekezo afite.

Ariko nyuma yaj gusubira mu buzima bwe asanga kugira ngo ave aho yari hari icyo yagombaga kwigomwa no gutumbera ku cyo yifuza.

Abifashijwemo n’umuryango uharanira inyungu z’abagore barokotse Jenoside AVEGA Agahozo, mu myaka 10 yari amaze arokotse Jenoside yatangiye kwiremamo ikizere atangira no gutekereza ku mibereho ye.

Agira ati “Jenoside yansize iheruheru mfite ubukene bwinshi n’agahinda gakomeye ariko maze kwigishwa no kwegerwa ntangira gukuza ibitekerezo ndahaguruka ndakora.”

Amaze kubona aho atura, yanatekereje kwagura isambu kugirango ajye abona aho ahinga n’aho yororera kuko yari amaze guhabwa inka, atangira kujya yigomwa bimwe mu byo yakeneraga agenda abika amafaranga make aza kubasha kugura ubutaka buto ngo yongere aho yari afite.

Avuga ko abikesha kugira intego no guharanira kwigira. Yashoboye kubyaza iyo nka izindi, ndetse atera n’urutoke rugari rwa kijyambere

Ati “Ubu aho nafatiye umwanzuro wo guhaguruka ngakora, maze gutera insina za FIA zigera kuri 300 n’inyamunyu zigera ku 100 kandi sinzahagararira aho kuko niyemeje gutera imbere kandi nkanafasha abandi bagore bakiri hasi cyane.”

Uyu mugore Nyiraneza avuga ko byamusabye ibintu byinshi nko kwigomwa igitenge cyiza akambara ibiciriritse kugirango azamuke ariko asanga atarahombye kuko agenda abigeraho.

Ubu Nyiraneza afite gahunda yo gufasha abaturanyi be by’umwihariko abapfakazi abaha imibyarare y’insina kugirango nabo batere imbere; akaba asaba abagore kutitinya kuko ngo nabo bashoboye.

Clarisse Umuhire