Abakozi b’akarere bavuga ko abantu biyise abakozi b’iyo sosiyete baje gukora ubukangurambaga bababwira ko igurisha ibikoresho byo mu gikoni n’iby’ikoranabuhanga nka mudasobwa, firigo, televiziyo na telefone; hakiyongeraho ipasi n’imashini zogosha.

Uru rupapuro ruragaragaza bimwe mu byizezwaga abakozi b’akarere ka Rwamagana.

Ibyo byose ngo bakabitangira ku giciro kigabanutse cyane kugeza kuri 50% ugereranyije n’uko bigurwa ku isoko rusange.

Abakozi bagera kuri 20 bishyuye amafaranga amafaranga ibihumbi 15 y’ifatabuguzi yasabwaga buri mukozi, ariko nyuma bashatse abo bantu barababura.

Bavuga ko bahamagaye na nomero za telefone batanze ntizaboneka, bahita bamenya ko ari abatekamutwe.

Umwe mu bakozi yavuze ko yigereye i Kigali mu nyubako ya “City Tower” aho yari yabwiwe ko bakorera ariko akababura.

Umwe mu bakozi b’akarere ka Rwamagana, yabwiye Kigali Today ko abo bantu bageze ku biro by’akarere tariki 18 Kanama 2015, baka uburenganzira bwo kwinjira mu nama rusange y’abakozi yari irimo kuba ari na ho bakoreye ubukangurambaga bwabo.

Abatangaga amafaranga ibihumbi 15 y’ifatabuguzi, bahabwaga inyemezabwishyu. Aha, twasibye izina ry’umukozi w’akarere na nomero za telefone ye.

Batangiye kubasobanurira ibijyanye na serivisi zabo, abakozi nabo banyuzwe banyuzwe n’ubwo bukangurambaga bushyura ayo mafaranga, abatari bafite ayo mafaranga ako kanya banaguza bagenzi babo kugira ngo badacikanwa.

Aba bakozi ngo bumvaga bibaye byo koko baba bagize amahirwe, kuko ubusanzwe badakunze kubona umwanya uhagije wo kujya guhaha ibikoresho nk’ibyo.

Twagerageje guhamagara numero za telefone zigaragara ku nyemezabwishyu z’iyo sosiyete, dusanga ntiziboneka. Twagerageje kandi kuvugisha ubuyobozi bw’akarere ariko ntibwifuje kugira icyo butangaza kuri iki kibazo.

Uretse ibijyanye n’amafaranga, aba bakozi bavugana agahinda n’ipfunwe byo kuba ari bantu bajijutse ariko bakaba baratekewe umutwe bene ako kageni. Cyakora ngo ibyababayeho ni isomo rikomeye ku buryo bitazongera kubabaho ukundi.

Emmanuel Ntivuguruzwa