Abasenyerwa ni Abanyekongo batuye Goma barenze ubutaka bwa Kongo bagatura mu Rwanda no ku butaka butagira nyirabwo.

Imodoka irimo gusenyera abarengereye abandi babuze aho bajya.

Kubasenyera bigamije ko ko haboneka ahazashyirwa imbago mu kuvugurura imipaka yashyizweho n’abakoloni tariki ya 25 Kamena 1911.

Kuva ku mupaka munini La croniche uhuza Goma na Gisenyi kugera ku Musozi wa Hehu habarwa imbago 22 ndetse 14 zamaze gushyirwaho hakaba hasigaye imbago umunani zubakiweho n’abaturage bari gusenyerwa kugira ngo zisubizweho.

Ukuriye impugucye z’Abanyekongo bashinzwe gusubizaho imipaka, Roger Rashidi Tumbul, avuga ko kuba abaturage basenyerwa kuko batumviye ubuyobozi mu gihe cy’amezi atandatu basabwe kwimuka ariko ntibikorwe. Akavuga ko n’abasenyerwa batazahabwa ingurane kuko nta byangombwa bafite ahubwo bituje mu mipaka y’ibihugu.

Abana bararyamishwa mu mitaka akaba ariho barazwa kubera kutagira aho kujya.

Aho Kigali Today yageze yasanze abana n’abagore basenyewe bicaye ku zuba, batangaza ko ari ho barara kuko nta handi bafite ho kujya mu gihe ngo bari basanzwe banakwa imisoro n’umujyi wa Goma.

Rwayitare Esdras ukuriye impuguce z’u Rwanda ziri gusubizaho imbago, yatangarije Kigali Today ko nyuma yo gushyiraho imbago 14 uvuye ku musozi wa Hehu ubu basigaje imbago zo mu mujyi kandi ziri mu mazu y’abaturage, bakaba bategereje ko bimurwa ngo zishyirweho.

Yagize ati “Twasabye ubuyobozi ko bwimura abaturage batuye ahagomba gushyirwa imbago, ku ruhande rw’u Rwanda abazangirizwa ntibarenze batatu kandi na bwo ni ibipangu bizasenywa si amazu batuyemo mu kuzuza metero 6,25 z’ubutaka butagira nyirabwo.”

Ubuyobozi bw’Akarere ka Rubavu buvuga ko butazasenyera abaturage nk’uko birimo gukorwa muri Kongo, ahubwo ko harimo gutegurwa uburyo abafite inyubako zizakorwaho n’imipaka zakurwaho batabangamiwe.

Sylidio Sebuharara