Ubwo bashyikirizwaga impamyabushobozi zabo, abafashe ijambo bose basabye kwibuka inshingano zabo zo gutanga ubuzima no kwita ku barwayi, bakaba badakwiriye kuzatandukira indahiro bagize.

Ishimwe Bazakare Marie Laetitia yahawe igihembo nk’umunyeshuri wahize abandi.

Abaforomo 128 n’ababyaza 70 basoje iki cyiciro, bitezweho gutanga umusaruro mu kubungabunga ubuzima bw’abaturage hirya no hino mu gihugu, by’umwihariko mu kurandura burundu ikibazo cy’ababyeyi bapfa babyara n’impinja zipfa zivuka.

Umuyobozi w’iryo shuri, Soeur Epiphanie Mukabaranga, yavuze ko bafite intego yo gutanga umusanzu ukomeye mu kubaka urwego rw’abaforomo n’ababyaza mu Rwanda.

Ibyo ngo bikazanyura mu gutanga ubumenyi ku rwego rwisumbuye ku buryo umwaka utaha, iri shuri rizatangira gahunda izabahesha impamyabumenyi z’icyiciro cya kabiri cya kaminuza (A0).

Uyu muhango wari witabiriwe n’abayobozi bo mu nzego zitandukanye.

Guverineri w’Intara y’Iburasirazuba, Odette Uwamariya, yasabye abasoje amasomo kumva ko umwuga binjiyemo usaba umuhamagaro, bityo bakazarangwa n’impuhwe kugira ngo bashobore kwita ku barwayi bazabagana.

Ishimwe Bazakare Marie Laetitia, umuforomokazi wahize abandi bose bigaga muri iri shuri agatsinda ku rwego rwo hejuru (Grande Distinction), yatangaje ko biteguye neza kwinjira mu mwuga wo kwita ku barwayi kandi avuga ko bumva neza agaciro n’umuhamagaro w’umwuga wabo.

Byari ibyishimo ku bahawe impamyabumenyi mu buforomo n’ububyaza.

Ishuri ry’Abaforomo n’Ababyaza rya Rwamagana, ryafunguye imiryango mu 1962 ritanga impamyabumenyi za A3. Nyuma gato, ryaje kugera ku mpamyabumenyi za A2. Kuva mu mwaka wa 2007, ryemewe nk’Ishuri Rikuru ry’Abaforomo n’Ababyaza ritanga impamyabumenyi z’icyiciro cya mbere cya kaminuza (A1).

Emmanuel Ntivuguruzwa