Ku gicamunsi cyo kuri uyu wa 28 Nyakanga 2015 abaturage basaga ibihumbi bitanu bo mu murenge wa Busoro mu karere ka Nyanza humvikanyemo amajwi yabashimangira ko ibikorwa bya perezida Paul Kagame byivugira bityo basaba ko ingingo ya 101 mu itegeko Nshinga ry’u Rwanda ivugururwa kugira ngo bakomezanye abayoboye.

Abaturage basaga ibihumbi bitanu bari bakoranye basaba ko ingingo 101 mu itegeko Nshinga ry’u Rwanda ivugurwa.

Ku kibuga cyaho aba baturage bari bateraniye hari ibyapa byinshi byanditseho amagambo asaba ko ingingo ya 101 mu itegeko Nshinga ivugururwa.

Bamwe muri bo bari bazanye inka borojwe muri gahunda ya Girinka munyarwanda yatangijwe na perezida Paul Kagame banitwaje n’umusaruro ukomoka mu buhinzi urimo imiceri, ibigori n’ibindi.

Abaturage 48 b’ingeri zinyuranye batanze ibitekerezo kugeza n’ubwo bwabiriyeho bagishaka kwiyongera ku mirongo bashimangira ko ubushobozi babona ku mukuru w’Igihugu cy’u Rwanda butuma bifuza ko abayobora kugeza ananiwe.

Umwe muri bo yagize ati “ Perezida Paul Kagame si mwamamaza kuko nta n’ibyo yantumye ahubwo ibikorwa bye nibyo bitugaragariza ko ashoboye gukomeza kuyobora u Rwanda.”

Bimwe mu byapa bari bitwaje.

Ibyo perezida Kagame yabagejeje byabyutsaga amarangamutima ya bamwe bakifuza ikintu cyamusubiza ubusore ngo ntasaze kugira ngo atazigera abangamirwa n’ikibazo cy’imyaka.

Nyiraneza Clementine uvuga ko afite ubwandu bw’agakoko ka virusi itera SIDA ari mu bashimangiye ko nta wundi muyobozi wayoboye u Rwanda yamugeraranya nawe. Ati “ Simpamya ko iyo hatabaho Perezida Kagame mba ntarishwe nta SIDA kuko nagombaga kubura ibinini nkitaba Imana imburagihe.”

Umurenge wa Busoro ubaye umurenge wa cyenda mu mirenge 10 igize akarere ka Nyanza abadepite bakiyemo ibitekerezo by’abaturage b’ingeri zinyuranye, basaba ko ingingo ya 101 mu itegeko Nshinga ivugururwa.

Jean Pierre Twizeyeyezu