Iyi ngingo igena ko Perezida yiyamamariza manda y’imyaka 7 ariko ntarenze inshuro ebyiri zikurikirana. Aba baturage rero barasaba ko ivugururwa kugira ngo Perezida Kagame, uzasoza manda ebyiri mu mwaka wa 2017, agire uburenganzira bwo kongera kwiyamamaza kuko ari we bakeneye ko abayobora kubera ibyiza yabagejejeho.

Mu Murenge wa Kayumbu mu Karere ka Kamonyi abaturage batanze ibitekerezo bose bashyigikiye ivugururwa ry’ingingo y’101 y’Itegeko Nshinga.

Mu byo bamushimira, harimo kubanisha ibyiciro by’Abanyarwanda bitandukanye mu gihe bari basohotse mu bihe bikomeye bya Jenoside yakorewe Abatutsi.

Uwitwa Gasago Gaspard, agira ati “Ubungubu Abanyarwanda barasangira ku ntebe y’ubutegetsi nyuma y’amahano yabaye mu1994, Abanyarwanda barasangirira mu mashyirahamwe no mu bimina. Igisumbye ibindi ni uko Abanyarwanda bagiranye ibibazo, kuri ubu barimo guhana abageni”.

Icyiciro cy’abasigajwe inyuma n’amateka , na cyo kitibonaga mu Banyarwanda kubera inenwa cyakorerwaga n’abandi; kirashima ubuyobozi bwa Kagame, kuko aharanira kubagezaho gahunda z’imibereho myiza n’iterambere na bo bakisanga mu bandi.

Furere Frodouard, umwe mu basigajwe inyuma n’amateka, atangaza ko nta wundi muyobozi wigeze agaragaza urukundo mu Banyarwanda uretse Paul Kagame. Ku bw’iyo mpamvu ngo akaba nta we ukwiye kumugenera manda, kuko ibikorwa bye bigaragaza ko ashoboye.

Aba baturage bagaragaje ko Kagame yatumye bahumuka bakamenya ubwenge akabaha n’umutekano bakabasha gukora, none ngo baracyamukeneye ngo n’ibyo batarageraho bazabibone.

Marie Josee Uwiringira