Yabivuze kuri uyu wa 4 Nyakaga 2015 imbere y’imbaga y’abaturage bo mu Karere ka Gicumbi bari mu birori by’Isabukuru ya 21 yo Kwibohora, ubwo yagaruka ku mpamvu zatumye Abanyarwanda batangiza urugamba rwo kwibohora.

Ashimangira ko kuvuga ukuri no gutinyuka kukuvuga biza ku isonga mu byatumye bagera ku ntego yabo yo kwibohora.

Yemeza ko kuba Abanyarwanda baremeye gutanga ubuzima bwabo ndetse bakabivunikira ari icyerekana ko bari bazi ko barwanira ukuri.

Peresida Kagame kandi yagaye ibihugu by’amahanga byivanga mu mibereho y’Abanyarwanda aho yanenze cyane abanditse ku mbuga nkoranyambaga bifuriza u Rwanda kwizihiza umunsi wo kwibohora ariko bakongeraho ko ngo basaba u Rwanda kubahiriza uburenganzira bwa muntu.

Yiyama abumva babwiriza Abanyarwanda uko bakwiye kubaho, Perezida Kagame yavuze ko kubwiza abantu ukuri no kwemera guhagarara ku kuri ari byo Abanyarwanda bose bagomba kugenderaho kugira ngo bereke amahanga ko icyo barwaniye bakizi kandi bakigezeho.

Asaba Abanyarwanda kutemera ikintu cyose cyabasubiza inyuma ndetse kikongera kubasubiza mu macakubiri yagejeje u Rwanda kuri Jenoside.

Yifurije Abanyrwanda gukomeza gushimangira ukuri kwabo ndetse bakakubakiraho kuko ukuri ari wo musingi w’iterambere ryo kurwana urugamba rwatumye bibohera ubutegetsi bubi.

Ernestine Musanabera