Nyiraneza atuye mu Kagali ka Rukira mu Murenge wa Huye wo mu Karere ka Huye, yahawe miliyoni y’amafaranga y’u Rwanda, mu gikorwa cyo kwibuka Jenoside yakorewe Abatutsi cyabaye kuri uyu wa kabiri tariki 30 Kamena 2015.

Bamwe mu bana Nyiraneza yahishe-babiri bo hagati baravukana, abandi ni Mukashaka na Evariste.

Senateri Jeanne d’Arc Gakuba Visi perezida wa Sena, ari na we wari ukuriye iri tsinda ryaje i Huye, yavuze ko icyo bazaniye Nyiraneza atari igihembo ahubwo impano yo kumwereka ko igikorwa yakoze ari ingirakamaro.

Yagize ati “Twakuzaniye ubufasha bwo gusana inzu yawe. Uzayigire neza uyitere amarangi, hanyuma nuzajya uyicaramo ujye wibuka ko wagiriye akamaro igihugu. Ubwo bufasha buzanagufasha kubaka ikiraro cy’inka utunze ku buryo bwa kijyambere.”

Yavuze kandi ko iyo haza kuboneka n’abandi babyeyi nk’uyu mu gihe cya jenoside, hari kurokoka abantu benshi mu Rwanda.

Nyiraneza ari kumwe na bamwe mu bagize inteko ishinga amategeko baje kumushimira, ndetse n’umwana umwe mu bo yahishe.

Bwari ubwa mbere Nyiraneza ashimirwa iki gikorwa, kandi byaranamushimishije. Ariko ngo byari kumushimisha kurushaho iyo abana bane mu bo yahishe n’ubu akirera, bavukana, baza guhabwa ubufasha nk’ubuhabwa abandi bana barokotse Jenoside batishoboye.

Ati “Aba bana nta wundi muntu basigaranye uretse njyewe. Niba kutabafasha ariko babonaga babana nanjye, simbizi. Ariko njye mbona ubwo bufasha babukeneye.”

Abo bana ubu barakuze, harimo n’uwiga muri kaminuza.

Marie Claire Joyeuse