Nyuma yo kugongwa n’umumotari atabashije kumenya ibimuranga ngo ashobore kumukurikirana amuvuze, Nsabimana Fidèle mu ijwi ry’umuntu ubabaye cyane yabwiye yavuze ko yari yazanye ku igare inyanya mu isoko ry’Akarere ka Nyanza rirema buri wa mbere wa buri cyumweru.

Ngo yatahaga iwabo mu Karere ka Huye bamugonga ageze hafi y’Ibiro by’Intara y’Amajyepfo i Busasamana mu Karere ka Nyanza.

Umumotari wamugonze ngo akaba yavugiraga kuri terefoni igendanwa kandi atwaye moto. Ubwo twamusangaga aho yagongewe wabonaga afite ibikomere ku mubiri cyane cyane ku maboko.

Ngo yamuhutaje arambarara mu muferege w’amazi mu gihe yegukaga asanga undi yamaze kurenga nta bundi buryo afite bwo kumukurikirana.

Agira ati “Bamwe mu bantu bari hafi y’aho bangongeye nibwiye ko bafashe ibiranga moto y’uwo mumotari ariko bampakaniye bambwira ko batabyitayeho ndetse ko na we batamuzi”.

Ngo ahantu yagongewe yahamaze hafi nk’iminota 20 atarabona ubufasha ariko ngo yaje kubasha kuhivana n’ubwo yari yababaye cyane.

Bamwe mu bantu bagiye bamugeraho bashungera bagaye imyitwarire y’uwo mumotari wamugonze akigendera ndetse na nyuma yaho bamwe muri bagenzi be bakora umwuga nk’uwe bamugaye bavuga ko ibyo yakoze ari ibikorwa bitari ibya muntu.

Umwe muri bo yagize ati “Ibyago bibaho ariko kugonga umuntu agasigara ameze nabi warangiza ukamuta ukiruka ntabwo ari iby’abantu yagombaga kumwegura akamusindagiza byaba na ngombwa agasaba ubufasha akamugeza kwa muganga”.

Nubwo umumotari wakoze ibi ngo bigoye kuba yamenyekana bamwe muri bagenzi be batangaje ko iki kibazo bazakigaho mu nama yabo ya koperative bakamagana iyi myitwarire idahitswe ikunze kuranga bamwe mu bayobozi b’ibinyabiziga mu muhanda.

Jean Pierre Twizeyeyezu