Ubusinzi bukabije ngo bugaragara mu duce two mu mirenge ikora ku Mujyi wa Muhanga, aho abaturage banywa inzoga z’inkorana na za Kanyanga bakitwara nabi haba mu ngo zabo no mu baturanyi.

SSpt Muheto avuga ko abasinzi batazihanganirwa kuko bahungabanya umutekano w’abaturage.

Polisi ivuga ko byaba byiza abaturage bitwaye neza bakamenya ko ubusinzi bwangiza ubuzima kandi bugateza imyitwarire idakwiriye Umunyarwanda.

SSpt Muheto avuga ko abashaka ubukire n’imibereho myiza batiyahuza ibiyoga by’ibikorano, ahubwo ko bakura amaboko mu mufuka bagakora kugirango biteze imbere.

Agira ati “Usanga abakene, bariya basaba inkunga, ari bo biganjemo abasinzi, kandi baba abagore baba abagabo bose muhura basinze ngo ni ukwinezeza”.

Muheto akomeza avuga ko ubusinzi butuma uburere bw’abana buhungabana, urugero atanga akaba ari umwana w’umuhungu uherutse kuvugwa mu bitangazamakuru ko yasambanyije nyina umubyara kubera ubusinzi.

Inzego za Polisi ngo zikwiye guhagurukira abasinzi kuko bateza umutekano mukeya, ariko mbere yo kubahana ngo ni ngombwa kubanza kubagira inama z’imyitwarire abumva bakumva abatumva bagafatirwa izindi ngamba.
Mu duce dutandukanye tw’Umujyi wa Muhanga uhasanga utubari twinshi ducuruza inzoga z’inzagwa ariko inzego z’umutekano zikavuga ko izo nzoga ziganjemo iz’inkorano kandi ko ziba zirimo uburozi bwangiza ubwenge.

Usibye kwiyangiriza kandi ngo ibiyobyabwenge byiganjemo ibisindisha bituma abakora akazi batandukira, aho usanga abatwara ibinyabiziga bakora impanuka, abajyaga ku kazi bakagasiba amakimbirane mu miryango bikiyongera byose ngo bikaba bidindiza iterambere ry’abaturage n’igihugu muri rusange.

Ephrem Murindabigwi