Iyo nzu yayubakiwe mu Mudugudu wa Karambo, Akagari ka Gatovu, iruhande rw’ahubakiwe imiryango 10 y’Abanyarwanda birukanywe muri Tanzaniya yayishyikirijwe mu muganda wabaye kuri uyu wa gatandatu tariki 30/5/2015.

Yashyikirijwe imfunguzo z’inzu n’umuyobozi w’akarere ka Huye.

Chantal Mukandutiye ushinzwe imibereho myiza mu kagari ka Gatovu avuga ko n’ubundi FARG yateganyaga kuzamwubakira ariko babonye ko bishobora kuzatinda kandi mukecuru ababaye kuko atari akigira aho aba kuko inzu ye bari bamusaniye nyuma ya jenoside yari yarasenyutse.

Biyemeje kumwubakira muri uku kwezi kw’ibikorwa by’urubyiruko, kuko n’ubundi bose abita abana be. We nta mwana asigaranye kuko bose babishe muri Jenoside, ariko ntiyemera ko ari inshike kuko ngo abaturanyi ari bo bana afite.

Ku muganda wo kuri uyu wa gatandatu niho hakozwe imirimo ya nyuma mbere y’uko bayimushyikiriza.

Iyi nzu n’ibikoresho Mukamusoni yahawe bifite agaciro ka miliyoni zirenga eshatu. Uretse amaboko y’urubyiruko yubatse iyi nzu, ibindi bikoresho byayikozeho, amabati umucanga, sima, inzugi n’amadirishya n’ibikoreshi by’ibanze bayimuhananye byavuye no mu mafaranga yegeranyijwe n’abaturage bo muri uyu murenge.

Abaturage bafatanyije n’urubyiruko nibo biyemeje kubakira uyu mukecuru.

Joyeuse Marie Claire