Iyi nama izitabirwa n’ ibihugu bisaga 30 bifite ingabo zibungabunga amahoro ku isi ndetse n’ ibihugu 10 bitanga inkunga muri ibyo bikorwa byo kubungabunga amahoro.

Inama mpuzamahanga ku kurinda abasivili igiye kubera mu Rwanda ngo izasiga bashyizeho uburyo buhamye bwo kubarinda.

Iyi nama ije ikurikira iyabereye i New York umwaka ushize muri Nzeri ubwo habaga inama ya 69 y’Umuryango w’Abibumbye (UN) yateguwe n’u Rwanda, Leta Zunze Ubumwe z’Amerika, Bangladesh, Pakistan n’u Buyapani.

Uruhare rw’u Rwanda mu bikorwa byo kubungabunga amahoro rwatangiye kugaragara nyuma ya Jenoside yakorewe Abatutsi mu 1994, aho rufite abasirikare basaga ibihumbi bine mu butumwa bw’amahoro hirya no hino ku isi birushyira ku mwanya wa gatanu ku isi n’uwa gatatu ku mugabane w’Afurika nyuma ya Ethiopiya na Nigeriya.

Kuri ubu u Rwanda ni kimwe mu bihugu biyoboye itsinda ry’ibihugu byitwa “Inshuti z’Abaharanira kurinda abaturage” rizwi nka R2P, Group of Friends of the Responsibility to Protect mu rurimi rw’Icyongereza bakorana n’umuryango mpuzamahanga mu kumvisha ibihugu byose byo ku isi uruhare rwabo mu gukumira no kurinda ubuzima bw’abaturage ndetse no kugira icyo bakora mu gihe habuze amahoro n’umutekano.

Mu myaka 70 ishize, Umuryango w’Abibumbye wagize uruhare rugaragara mu kubungabunga amahoro ku isi mu gihe cy’intambara n’amakimbirane, icyakora intambwe yo guterwa iracyari ndende kugira ngo ibikorwa byo kubungabunga amahoro birusheho kunozwa neza, by’umwihariko mu kubihuza.

Nubwo ikigenderewe mu butumwa bw’amahoro ari kubungabunga umutekano w’abantu bose ariko hari igihe izo nshingano zabo ntibazigereho uko bikwiye.

Ngo iyi nama mpuzamahanga igiye kubera i Kigali, izarabera hamwe imbogamizi bahura na zo ndetse itange imyanzuro ifatika ku buryo hahurizwa hamwe imbaraga mu bikorwa byo kurinda abasivili dore ko ahanini ari bo baba badafite kirengera.

NSHIMIYIMANA Leonard