Rutayisire avuga ko nyuma yo kubuzwa n’ubuyobozi kubaka ngo bwamwijeje ko buzamuha inzu mu mazu 10 yubakirwa abazimurwa mu manegeka ziri mu Murenge wa Kazo, ariko ngo hashize imyaka ibiri zitaruzura none yabuze uko abigenza.

Ati “Bambwira ko ngo inzu zibura ibikoni na wese (ubwiherero) ariko njye aho ngeze banyemereye n’ubu najyayo sinabura n’umuganda ubinyubakira kuko ubuzima mbayeho burambangamiye cyane. Hashize imyaka ibiri bambwira ngo vuba baraba bayimpaye”.

Rutayisire imbere y’inzu atuyemo we n’umugore n’abana 12. Ngo bimwe mu bikoresho byo mu nzu yarabicumbikishije.

Akomeza avuga ko muri abo bana 12 afite harimo babiri bafite ubumuga bwo mu mutwe aba atagomba kuraza hamwe n’abandi bityo nabyo bigatuma iyi nzu irushaho kuba nto cyane bakarara bahekeranye.

Uretse kuba aba mu kazu gato yarabujijwe kwagura, Rutayisire ngo abangamiwe cyane n’imyanda iva mu bwiherero bw’ibitaro bya Kibungo iruhukira mu kazu abamo cyane cyane mu gihe cy’imvura, kuko atuye mu nsi y’ibitaro bya Kibungo ahantu hahanamye.

Mupenzi George, umuyobozi w’Akarere ka Ngoma wungirije ushinzwe imari n’iterambere ry’ubukungu, avuga ko mu gihe kitarenze ibyumweru bibiri aya mazu aba yuzuye kuko miliyoni ebyiri zaburaga ngo yuzure bamaze kuzibona.

Amwe mu mazu bubakiye abatuye mu manegeka amaze igihe kirenga umwaka ataruzura.

Yagize ati “Amazu yari yubatswe ntiyarangira ariko inyigo igaragaza ko haburaga miliyoni ebyiri ngo zuzure, gukingwa ndetse n’ibindi byibanze birimo n’amashanyarazi. Mu byumweru bibiri biraba byarangiye uwo muturage atuzwe kimwe n’abandi bafite ikibazo cyo gutura mu manegeka”.

Amazu yubatswe muri iyi gahunda asa naho yatangiye gusaza kubera kutayabamo, mu gihe usanga akibura inzugi z’imbere, ibikoni ndetse n’ubwiherero.

Amafaranga yubatse aya mazu yavuye mu bafatanyabikorwa, abikorera n’uruhare rw’akarere. Buri nzu muri izo 10 zubatswe ifite agaciro k’amafaranga y’u Rwanda ari hagati ya miliyoni eshanu na miliyoni zirindwi.

Jean Claude Gakwaya