Muri iki gitaramo nga hazaba harimo n’amatorero azava hanze y’u Rwanda cyane cyane ayo mu karere.

Ingonzo ngari ngo yiteguye gushimisha abazitabira igitaramo cy’isabukuru yayo.

Nshimiyimana Gilles, ushinzwe itangazamakuru muri iri torero, yadutangarije ko bizaba ari ibirori bikomeye bityo bakaba bari kubyitegurana imbaraga n’ubwitonzi bwinshi.

Yagize ati “Dufite ubufatanye n’andi matorero yo mu bindi bihugu akomeye cyane cyane ayo mu karere tujya tubasha kubonana, tukaba tukiri kuvugana ku buryo nibigenda neza tuzakorana”.

Inganzo Ngari muri icyo gitaramo ngo bazifatanya n’andi matorero yo mu karere.

Yakomeje agira ati “Abakunzi bacu tubafitiye ibintu byinshi tuzabereka. Twatangiye turi bakeya, akagufu kakiri gake ariko ubungubu tumaze kugira ingufu zihagije cyane mu rwego technique, kwambara, decoration mbese tuzashimisha cyane abakunzi bacu.”

Na Diaspora ngo ntibayibagiwe kuko ngo bateganya ko icyo gitaramo kizaca no ku ikoranabuhanga mu buryo bwa streaming bwerekana ibintu birimo kuba binyuze kuri interineti.

Inganzo Ngari yatangiye ari mbarwa none ubu irakabakaba abantu 100. Ngo iri torero ryatangiye rigizwe n’abantu batageze kuri 20 none ubungubu ababigize umwuga baririmo babarirwa muri 80 kandi ngo hari n’abandi bafite batabigize umwuga.

Nshimiyimana avuga kandi ko abashaka kwinjira mu Nganzo Ngari imiryango ikinguye, igikenewe ngo akaba ari ubushake n’ubushobozi.
Agira ati “Kwinjira mu itorero ntabwo bisaba ibintu byinshi cyane, ikintu cya mbere ni ukuba ubishoboye, hari criteres abatoza bagenda bareberaho, waba ubishoboye nta kindi kiba gisigaye.”

Inganzo Ngari kandi rikubutse Singapore muri Chingay Festival 2015.

Igitaramo cy’isabukuru y’Inganzo Ngari ngo kizabera muri Serena Hotel ku wa 25 Ukwakira 2015 guhera saa kumi n’imwe z’umugoroba.

Icyakora ngo haracyari kare ko bavuga ibiciro byo kwinjira kuko bataramenye neza ibyo imyiteguro izabasaba nubwo bemeza ko igeze kure. Itorero Inganzo Ngari kandi rikubutse Singapore muri Chingay Festival 2015.

Marie Clemence CYIZA UWIMANIMPAYE