Mu bihe byashize gukorana na banki n’ibigo by’imari byafatwaga nk’iby’abafite amikoro ahambaye kandi bize, bigatuma abaturage baciriritse batabasha kwizigama muri duke babona.

Iyi myumvire yagiye ihinduka nyuma y’aho leta y’u Rwanda itangiriye gahunda yo kwegereza abaturage ibigo by’imari iciriritse. Kugeza ubu buri Munyarwanda ngo ashobora kugana ikigo cy’imari atazitiwe n’amikoro ye.

Gatare Samuel atanga ubuhamya ko atarakorana na Sacco yari umukene ariko ubu amaze kugera ku bikorwa by’ubuhinzi n’ubworozi bifite agaciro ka miliyoni ebyiri z’amafaranga y’u Rwanda kandi yaratangiranye inguzanyo y’ibihumbi 200.

Uwitwa Butera Thomas we avuga ko amaze kugura imodoka ya tagisi kandi yaratangiriye ku nguzanyo y’ibihumbi 100, uko yagendaga yishyura agasaba iyisumbuyeho.

Umucungamutungo wa SACCO ya Nyamirama, Nyirigira Eric avuga ko amenshi mu mafaranga ifite ari ayo abaturage bagenda bashyira hamwe mu matsinda, bigatuma ubwizigame bwa yo buhora buhagaze neza.

Ibyo ngo bituma iyo Sacco ihora yiteguye kwakira abaturage bakeneye inguzanyo ku buryo nta muturage ukwiye kugira impungenge zo guhabwa inguzanyo kuko Sacco ari iy’abaturage bose.

Gukorana n’abaturage neza ngo byatumye Sacco ya Nyamirama itera imbere ku buryo bugaragara, abanyamuryango ba yo bakaba baherutse kwiyuzuriza inyubako yatwaye miliyoni zisaga 60 z’amafaranga y’u Rwanda.

Umucungamutungo wa yo avuga ko nta rindi banga ryakoreshejwe ngo ibyo bishoboke uretse kubakira ku cyizere abaturage bagiriye iyo Sacco kubera uburyo ibacungira neza amafaranga.

Cyprien M. Ngendahimana