Aba bakunzi b’ikipe ya Arsenal yo mu bwongereza ariko baba mu Rwanda, ku wa gatandatu tariki ya 02 Gicurasi 2015 bahagurutse i Kigali i saa mbili za mu gitondo, maze ahagana i saa tanu berekeza ku rwibutso rwa Jenoside rw’i Nyanza ndetse banunamira inzirakarengane zazize Jenoside yakorewe abatutsi mu mwaka wa 1994 zishyinguye muri urwo rwibutso.

Nyuma yo kunamira inzirakarengane,abakunzi ba Arsenal berekeje mu Mudugudu wa Nyamagana B, Akagari ka Kavumu mu Murenge wa Busasamana aho boroje imiryango 36 y’imfubyi n’abapfakazi ba Jenoside, byakurikiwe n’ubusabane mu rwego rwo kubahumuriza no kubaremamo icyizere ko ubuzima bugikomeza.

Babanje kunamira abazize Jenoside bashyinguye mu rwibutso rwa Jenoside rwa Nyanza.

Nyuma y’iki gikorwa, Appolo Munanura, umuyobozi w’ihuriro ry’abakunzi ba Arsenal mu Rwanda yatangaje ko yishimiye igikorwa cya kimuntu bakoreye i Nyanza cyane ko biyumva nk’abanyarwanda mbere yo kuba abafana ba Arsenal.

Runanura yagize ati "Twazinduwe n’urukundo n’ishyaka ryo kuza kuremera abanyarwanda bagenzi bacu bagizwe ho ingaruka zikomeye na Jenoside yakorewe abatutsi muri 1994 cyane ko nk’uko tureba umupira tuba tugomba no kunguka ibyateza imbere abanyarwanda".

Baremeye abarokotse Jenoside babaha ihene ndetse n’umuganda.

Iri huriro ry’abakunzi ba Arsenal rigizwe n’abanyamuryango barenga 200 aho abanyamuryango baryo bishakamo ubushobozi bwo gukora ibikorwa by’iterambere ndetse bakaba bateganya no kuba itsinda rizwi ku rwego mpuzamahanga.

Dore uko ibikorwa byagenze mu mafoto:

Bakigera i Nyanza babanje kunamira abazize Jenoside bashyinguye mu rwibutso rwa Jenoside rwa Nyanza banarutera inkunga.

Basuye urwibutso rushyinguye mo imibiri y’abazize Jenoside yakorewe abatutsi 1994

Bunamira inzirakarengane zazize Jenoside yakorewe abatutsi mu mwaka wa 1994

Nyuma bahaye umuganda abarokotse Jenoside yakorewe abatutsi, barabaremera ndetse baranasabana.

Abafana ba Arsenal FC bashyikiriza abarokotse Jenoside amatungo magufi babageneye.

Sammy IMANISHIMWE