Umukozi ushinzwe Ibikorwaremezo mu Karere ka Musanze, Francois Hakizimana, avuga ko imirimo yo kuvugurura Stade Ubworoherane izakorwa mu byiciro bitandukanye kubera ubushobozi buke bw’akarere.

Mu ngengo y’imari y’uyu mwaka, akarere kateganyije hafi miliyoni 50 zizakoreshwa mu bikorwa byo kuvugurura iyo stade.

Imirimo izakorwa ni iyo gufata amazi yose yajyaga mu kibuga, gutunganya amarembo no kubaka ubwiherero.

Abaturage bashima icyo gikorwa kuko isura y’umujyi izahinduka kuko abakunzi b’umupira w’amaguru bazajya bicara ahantu hasa neza ndetse n’abaturage muri rusange mu gihe hari nk’ikintu kihabereye.

Icyakora, basanga icyagombaga gukorwa mbere ya byose ari ugushakira iyo stade aho bambarira (vestiaire) no kongera imyanya yo kwicaramo isakaye, ngo ibyo gutunganya amarembo ntibyihutirwaga cyane.

Umwe agira ati “Dukurikije igishushanyo byaba ari byiza ukurikije aho Stade iherereye ariko hiyongereyeho akandi gapande gasakaye byaba ari byiza.”

Mugenzi yunzemo ati “Nta kintu gihambaye bayivuguruyeho uretse gate (amarembo) kandi si ingenzi nk’aho kwicara na vestiaire, stade nziza igomba kuba ifite vestiaire n’aho abantu bicara.”

Hakizimana avuga ko kubaka aho abakinnyi bambarira no gushyira amapave mu bice by’imbere muri stade bizakorwa mu ngengo y’imari itaha ariko ibyo kongera imyanya isakaye ngo birenze ubushobozi bw’akarere.

Avuga ko ubuyobozi bw’akarere buri kuganira n’ Ishyirahamwe ry’Umupira w’Amaguru mu Rwanda (FERWAFA) kugira ngo rizabafashe kwagura stade.

Stade Ubworoherane ikoreshwa by’umwihariko n’ikipe ya Musanze FC mu myitozo no mu mikino itandukanye ndetse ubuyobozi n’abikorera na bo barayikenera mu birori n’inama bagirana n’abaturage.

NSHIMIYIMANA Leonard