Umuhuzabikorwa wa Isange One Stop Center ku rwego rw’Igihugu, ACP Dr. Wilson RUBANZANA yavuze ko polisi y’igihugu igamije kwihutisha uburyo bwo gutanga amakuru ku bikorwa by’ihohoterwa rishingiye ku gitsina, ihohoterwa rikorerwa abana ndetse no kwita ku bahohotewe.

Umuyobozi w’Inama y’Igihugu y’Abagore mu Karere ka Ngororero, Kampire Christine avuga ko mu miryango imwe n’imwe yo muri aka karere hakigaragara ihohoterwa rishingiye ku gitsina n’irikorerwa abana.

Yemeza ko uburyo basanzwe bakoresha mu bukangurambaga no gufasha abahohotewe butari buhagije ndetse byagiye bigaragara ko bamwe boherezwa i Kigali, bakaba babonye igisubizo iwabo.

Nyirabarata Françoise wo mu murenge wa Kageyo mu Karere ka Ngororero avuga ko nawe ubwe ahohoterwa n’uwo bashakanye ariko akaba yari yarabuze aho bamuha ubujyanama bwihariye, kuko asanga ikibazo cye kitakemurwa n’inzego z’ibanze kuko zakinaniwe.

Serivisi za Isange One Stop Center ubu ziratangirwa ku bitaro bya Muhororo mu karere ka Ngororero, ahashyizwe isuzumiro (laboratory) hamwe n’abakozi batandukanye babishinzwe, ariko ngo bizakomeza no kugezwa ahandi muri aka karere.

Kuba iki gikorwa gihuriweho na Polisi y’Igihugu, Minisiteri y’Ubutabera, MIGEPROF hamwe na Minisiteri y’ubuzima, ngo bizatuma abahohotewe babona hafi serivisi zose bazakenera.

Muri aka karere ngo hari abaturage bafata ibikorwa by’ihohoterwa bakabikemura hifashishijwe inzoga z’abagabo n’ibyo bita impozamarira bikaba ari kimwe mu byatumaga ihohoterwa ridacika, iki kigo kikaba kizabafasha kubirwanya.

Mu mwaka wa 2014, ibyaha by’ihohoterwa rishingiye ku gitsina 14 byagaragaye muri aka karere, naho kugeza muri Werurwe 2015 hamaze kugaragara ibyaha 3.

Ernest kalinganire