Ibi byateje umwuka mubi hagati y’aba bagabo nyuma y’uko hasohotse inkuru mu bitangazamakuru ko Producer Prince yiyitiriye indirimbo Producer Bob na Producer Nicolas Nic bakoze hanyuma Jules Sentore ntagaragaze ukuri kandi akuzi, ibi bikaba byari bimaze gufata intera itari nziza kandi ubundi aba basore bari basanzwe ari incuti kuva cyera kandi baranakoranye igihe kinini.

Mu kiganiro Kigali Today yagiranye nabo ku wa mbere tariki 20 Mata 2015 buri umwe ku ruhande rwe, yasanze bamaze gufata umwanzuro wo kugira ngo bicare basase inzobe aho gukomeza kugana ibitangazamakuru, dore ko banemeza ko nta kindi byari kubagezaho uretse gukomeza ikibazo kandi mu by’ukuri bo hagati yabo bari kugikemura.

Producer Bob, n’agahinda kenshi, yavuze ko yababajwe cyane no kuba ibintu bitakagiye mu itangazamakuru biri kugenda birushaho gufata indi ntera, aho we asanga bishobora no kubicira amazina ndetse bikaba byanatuma abari incuti bahinduka abanzi kandi bitari ngombwa.

Yagize ati “Mu by’ukuri ibi bintu biri gufata intera bitagakwiye, ntabwo byari bikwiriye ko twirirwa mu bitangazamakuru kubera biriya bintu by’indirimbo...”

Producer Prince nawe asanga byakabaye byiza ko bakwicara bagasasa inzobe ibibazo bigakemukira hagati yabo aho kwirirwa mu bitangazamakuru.

Yagize ati “Ni ukuri nanjye nageze mu Rwanda nsanga ibitangazamakuru byose nta yindi nkuru kandi vraiment ntibyari bikwiriye. Twamaze guhamagarana turashaka kwicara tubicoce nk’abantu b’abagabo. Twari twavuze saa munani ariko kubera akazi ntibyadukundiye ariko tubirimo”.

Producer Nicolas ku ruhande rwe nawe niko abibona, asanga nk’abavandimwe byagakwiriye ko bicara bakabiganiraho, bakabicocera hagati yabo.

Yagize ati “Ni ama mistakes yagiye abaho gutyo ariko rwose turimo kureba uko twicara ngo tubikemure, nanjye nabibonye gutyo ahantu hatandukanye ariko turi kureba uburyo byakemuka”.

Marie Clemence CYIZA UWIMANIMPAYE