Yves Rubasha ukina muri Amerika yiyongereye mu Mavubi

21-04-2015 - 02:00' | Ibitekerezo ( 4 )

Myugariro w’imyaka 18 ukina muri leta zunze ubumwe z’Amerika, Yves Rubasha yamaze guhamagarwa mu ikipe y’igihugu y’abatarengeje imyaka 23 yitegura umukino wa Somalia U23 uzaba mu mpera z’iki cyumweru.

Yves Rubasha akinira ikipe ya Portland Timbers y’abatarengeje imyaka 23 muri Leta Zunze Ubumwe z’Amerika (USA) yamaze kwiyongera ku bakinnyi 24 bahamagawe n’umutoza w’ikipe y’igihugu y’abaterengeje imyaka 23, Johnny McKinstry.

Yves Rubasha (Umwirabura ku murongo wa kabiri) yifotozanya n'ikipe ye

Iyi kipe yatangiye imyitozo ku wa mbere tariki ya 20 Mata 2015, imyitozo iyobowe n’umutoza Johnny McKinstry wungirijwe na Thierry Hitimana hamwe na Higiro Thomas wagizwe umutoza w’abazamu.

Yves Rubasha w'imyaka 18 yahamagawe mu mavubi y'abatarengeje 23

Ishyirahamwe ry’umupira w’amaguru mu Rwanda (FERWAFA) rivuga ko Rubasha ufite imyaka 18 ndetse akanakina nka myugariro, aje yiyongera ku bakinnyi babiri barimo Salomon Nirisarike (VV St Truiden-Belgium) na Bon Fils Kabanda (ASD Sangiovannese-Italy) bakina hanze y’u Rwanda.

Iyi kipe ya Portland Timbers y’abatarengeje imyaka 23 yashinzwe tariki 11 Ugushyingo 2008, ikaba ari ikipe itarabigize umwuga.

Sammy IMANISHIMWE