Imibiri yashyinguwe yabonetse ahitwa ku Muzigiti ahahoze ari segiteri Kibimba, hakaba haraguye abatutsi benshi kuko hari bariyeri.

Imibiri y’abazize Jenoside yakorewe Abatutsi bayikuye mu Kiriziya bagiye kuyishyingura mu cyubahiro mu rwibutso.

Rudahunga Eric uhagarariye IBUKA mu murenge wa Mutenderi, avuga ko iyo mibili yari yarashatswe igihe kinini ariko ababishe ntibatange amakuru yaho babajugunye.

Yongeyeho ko iyo mibili yaje kuboneka ubwo umuntu yacukuraga itaka ryo kubaka inzu maze acukuye abona iyo mibili atabaza ubuyobozi, nyuma barebye baza gusanga ari iyo mibili yari yarabuze.

Imibiri yabonywe yashyinguwe mu cyubahiro nyuma y’imyaka 21 ababishe baranze gutanga amakuru y’aho babashyize.

Yagize ati “Twakomeje kubaho dushakisha amakuru ariko abaturage barayimana aho babiciye ariko ejo bundi mu kwa gatandatu kumwaka ushize nibwo ,umuntu wumwana yagiye mu gasozi ajya gushaka umugina agiye gukora inzu,arimbuye umugina agwa kuri iyo mibili nuko abibwira abantu.”

Mu buhamya bwatanzwe na Byukusenge Pascal warokokeye kuri iyi paruwasi, yatanze ubuhamya bw’uburyo Abatutsi bari bahahungiye bishwe n’uburyo yaje kurokorwa n’uwitwa Nzabonimana akamuhisha.

Imibiri yashyizwe mu rwibutso ahashyinguye indi.

Nyuma y’ubuhamya bwe Pascal yashimye cyane uwamuhishe akabasha kurokoka amushimira umutima yagize aho ngo nawe yashoboraga kuba yabizira iyo bahamusanga ariko akemera kumuhisha ndetse bakabaza no gusaka mu cyumba yari arimo ariko Imana ikamufasha ntibamubone.

Nyuma yubwo buhamya Nzabonimana yashimwe uwo mutima ndetse bavuga ko iyo haboneka abanyarwanda benshi bafite uwo mutima mu murenge wa Mutendeli no mu nkengero zaho haba hararokotse benshi.

Iyo mibili yashyinguwe mu rwibutso rwa Jenoside rwa Mutendeli ije isanga indi mibili irenga ibihumbi bine ihashyinguwe y’abazize Jenoside barimo abaguye muri kiliziya ya paroisse ndetse no mu nkengero zaho mu mirenge ya Gahara, Mutendeli na Kazo n’abandi bari baturutse hirya no hino bahungiye mu kiriziya no mu ivuriro rya Kinyarwanda.

Jean Claude Gakwaya