Nk’uko bigaragara muri raporo yagejejwe ku nama njyanama y’Akarere ka Burera, mu mwaka wa 2017 abanyaburera bazaba bafite amazi ku kigero cya 100% bavuye ku kigero cya 76,1% bariho ubu.

Imyaka ibiri gusa isigaye kugira ngo iyo ntego bihaye bayigereho umuntu yabona ari mike. Gusa ubuyobozi bw’Akarere ka Burera buhamya ko buzayigeraho kuko babifite mu mihigo.

Ubu buyobozi buvuga kandi ko gukwirakwiza amazi mu baturage babifashwamo n’umushinga WASH, ushinzwe iby’isuku n’isukura muri ako karere.

Abaturage ba Burera bose bazaba bagerwaho n’amazi meza muri 2017.

Nubwo ariko abanyaburera bakomeza kwegerezwa imiyoboro y’amazi meza usanga hamwe na hamwe idakora uko bikwiye ngo abaturage babone amazi buri gihe.

Nko mu Murenge wa Cyanika mu gace kegereye ikirunga cya Muhabura ahitwa Nyagahinga bagejejweho amazi bwa mbere muri Nyakanga 2014, ariko abaturage baho bavuga ko amazi aza rimwe na rimwe.

Bavuga ko amazi bavoma akururwa n’imashini ikoresha mazutu yaba yashizemo ntibongere kubona amazi.

Muri Santere ya Kivuye ihuriweho n’imirenge ya Kivuye na Gatebe naho hari ivomo ry’amazi meza, ariko abahatuye bahamya ko iryo vomo ribonekamo amazi rimwe na rimwe, nabwo bigaterwa n’uko imashini ibagezaho amazi ikoreshwa na mazutu.

Ubuyobozi bw’Akarere ka Burera buhamya ko muri utwo duce hagejejwe umuriro w’amashanyarazi. Ngo hari gahunda yo gukora ku buryo izo mashini zikurura amazi zizajya zikoresha amashanyarazi bityo abaturage bakajya babona amazi buri gihe.

Ikindi ngo ni uko abaturage basabwa gutura ahantu hamwe mu midugudu kugira ngo bose bazagezweho imiyoboro y’amazi meza aho itaragera.

Norbert NIYIZURUGERO