Izo nyubako zubatswe na Good neighbors zigizwe n’ibyumba by’amashuri 7, ibiro by’ubuyobozi, ububiko bw’ibitabo, igikoni n’ubwiherero.

Ababyeyi barerera kuri iri shuri bavuga ko abana babo barangizaga imyaka 6 y’amashuri abanza bakagira ikibazo cyo gukomeza ayisumbuye kuko bakoraga urugendo rurerure bajya kwiga ku bindi bigo, bamwe muri bo bikabaviramo kuva mu ishuri.

Amashuri yubatswe azafasha abanyeshuri guhita bakomeza kugeza mu mwaka wa gatatu w’amashuri yisumbuye.

Ngo bajyaga kwiga ku Rwunge rw’amashuri rwa Gasharara ahari ibirometero bitanu uvuye i Kagina, abandi bakajya i Gihara mu birometero bitatu.

Niyonsaba Athanasie, umwe mu babyeyi barerera kuri icyo kigo atangaza ko abana bagiraga ibibarangaza byinshi bikabasibya ishuri. Atanga urugero kuri bamwe mu bakobwa bahuraga n’ababashuka bakabashora mu burara bakabyara igihe kitageze.

Good Neighbors nk’umuryango nterankunga ufasha mu bikorwa bitandukanye by’iterambere mu Kagari ka Kagina, ngo yahisemo gushyigikira Leta muri gahunda yayo yo guteza imbere uburezi bw’ibanze bw’imyaka 9 na 12.

Soonjib Baek uyobora Good Neighbors avuga ko guteza imbere uburezi ari uguha icyizere ejo hazaza h’urubyiruko.

Umuyobozi w’uyu muryango mu Rwanda, SOONJIB BAEK, atangaza ko korohereza abana kugana ishuri ari uguha icyizere ejo hazaza habo. Uyu ngo ni umushinga wa kabiri w’uburezi umuryango wa bo ufanyinyijemo n’Akarere ka Kamonyi.

Amashuri yubatswe yatangiye kwigirwamo mu ntangiro z’umwaka w’amashuri wa 2015. Umuyobozi w’Akarere ka Kamonyi, Rutsinga Jacques, ahamya ko uretse kugabanyiriza imvune abanyeshuri bajyaga kwiga kure bizongera ikigereranyo cy’imitsindire muri iki kigo.

Uretse Akagari ka Kagina, Good Neighbors ifasha n’abaturage b’Akagari ka Ngoma ho mu Murenge wa Nyamiyaga, aha naho bakaba barubakiwe ibyumba by’amashuri bifite agaciro ka Miliyoni zisaga 120.

Marie Josée Uwiringira