N’ubwo Amavubi yagerageje kwitwara neza mu gice cya mbere bakarangiza ari ubusa ku busa, ntibyaje kuyihira kuko yaje gutsindwa ibitego bibiri ku busa mu gice cya kabiri.

Ibi bitego byatsinzwe na Kapiteni Rainford Kalaba ku munota wa 60 ubwo umukinnyi Nshutiyamagara Ismael yari ajyanywe hanze nyuma yo kugira ikibazo cy’imvune, ategereje gusimburwa na Tubane James.

Igitego cya kabiri cyaje gutsindwa na Allan Mukuka ku munota wa 80 ku makosa y’ab’inyuma b’ikipe y’Amavubi.

Rainford Kalaba watsinze igitego ahanganye na Rusheshangoga Michel.

Nyuma y’uyu mukino, umutoza Johnny McKinstry yatangaje ko yishimiye uko ikipe ye yitwaye n’ubwo yatsinzwe bibiri ku busa.

Yagize ati "Iyi ni intangiriro nziza, urebye ko iyi kipe igizwe n’abakinnyi bakiri bato yitwaye, cyane urebye uko nko mu gice cya mbere twarushije bigaragara ikipe ya Zambia".

Amavubi yaherukaga gutsindwa tariki ya 20 Nyakanga 2014, ubwo yatsindwaga na Congo Brazzaville ibitego bibiri ku busa mu mukino wabereye i Pointe Noire.

Ubwo hatangazwaga abakinnyi 18 bagomba kwerekeza mu gihugu cya Zambia, hatangiye kwibazwa ko hari bamwe mu bakinnyi baba barasigaye nyamara bamaze iminsi bagaragaza ko bitwara neza haba mu mavubi ndetse no mu makipe yabo.

Mu bakinnyi bavuzwe cyane ni ba rutahizamu barimo Ndahinduka Michel uzwi nka Bugesera kuva mu w’2013 umaze gutsindira Amavubi ibitego bitanu ndetse anafite ibitego bitanu muri iyi Shampiyona; Sugira Ernest nawe umaze gutsindira ikipe ya AS kigali ibitego icyenda muri iyi Shampiyona; na Muganza Isaac umaze gutsindira ikipe ya Rayon Sports ibitego bitanu.

Abakurikiranira hafi umupira w’amaguru kandi bakomeje gukemanga urutonde rwari rwabanje mu kibuga aho abakinnyi basanzwe mu ikipe imaze iminsi yitwara neza barimo Iranzi Jean Claude ndetse na Mugiraneza Jean Baptiste batabanje mu kibuga, ahubwo hakabanzamo abakinnyi nka Bertrand Iradukunda umaze gutsinda ibitego bibiri muri iyi Shampiyona y’u Rwanda.

Abakinyi babanjemo:

Rwanda: Kwizera Olivier, Rusheshangonga Michel, Ismail Nshutiyamagara, Emery Bayisenge, Mutijima Janvier, Djihad Bizimana, Rachid Kalisa, Mico Justin, Haruna Niyonzima (C), Sibomana Patrick and Iradukunda Bertrand.

Zambia: Danny Munyao, Kabaso Chongo, Donashano Malama, Bronson Chama, Christopher Munthali, Kondwani Mtonga, Justin Zulu, Rainford Kalaba (C), Jackson Mwanza, Given Singuluma na Bonwell Mwape.

Sammy Imanishimwe