Inama Njyanama y’Akarere ka Huye yabyemeje ku wa 27 Werurwe 2015 inemeza ko ibibanza byo guturamo bitazongera kuba m20X25 nk’uko byari bimeze mu minsi yashize, ahubwo ko bigomba kuba m15X20.

Ngo nta n’umuntu uzongera kwemererwa kubaka inzu y’ibyumba bigera ku 10 nk’uko byagiye bigaragara mu minsi yashize, kuko ari ukwangiza umwanya abandi bantu bagatuyemo.

Mu Karere ka Huye ngo ntawe uzongera kubaka ikizu kinini keretse ari igorofa kugira ngo barengere ubutaka bwo guturaho.

Nk’uko serivisi ishinzwe ubutaka mu Karere ka Huye ibisobanura, ngo igishushanyombonera cyakozwe kigaragaza icyagenewe gukorerwa kuri buri buso bugize akarere: aho gutura, aho guhingwa, aho kororera, aho gutera amashyamba,…
Bityo umuntu wese ugiye kubaka akaba agomba kugendera kuri icyo gishushanyo mbonera kandi akubahiriza ibisabwa.

Abantu rero basabwa kuzajya bubaka amazu arimo ibyumba bakeneye gusa. Ngo uwifuza ibyumba byinshi azajye yubaka agana hejuru (etaje).

Icyo abubaka bagirwaho inama kandi, ni ugutekereza kuzajya bishyira hamwe bakubaka amazu yo kubamo, dore ko ngo n’ibyangombwa by’icyumba kimwe bizajya bitangwa.

N’abubaka ibigo by’amashuri, amavuriro, … ngo bagomba gutangira gutekereza kubaka mu buryo bw’amagorofa.

Abafite ubutaka bwo guhinga na bo bazajya basabwa guteramo ibiti bitangiza imyaka kuko n’amashyamba akenewe mu mibereho myiza y’abaturarwanda.

Akarere katangiye kubaka amazu y’icyitegererezo mu gufatanya kubaka

Mu rwego rwo kwereka abantu ko bashobora kwifatanya bakubaka amazu bafatanyije, bityo bikabatwara amafaranga makeya ukurikije ayatangwa buri wese yubatse iye nzu, Akarere ka Huye karimo kubaka amazu asangiye inkuta yagenewe imiryango 16.

Amazu y’i Ruhashya yubatse ku buryo bugabanya ubuso abantu bagombye guturaho kandi ngo arahendutse ugereranyije no kuba buri wese yakwiyubakira.

Ku ikubitiro, Akarere ka Huye katangiye kubaka bene aya mazu mu Mudugudu wo mu Murenge wa Ruhashya, hafi y’ishami ryo mu majyepfo ry’Ikigo gishinzwe guteza imbere ubuhinzi n’ubworozi (RAB-Rubona).

Yubatse mu matafari ahiye, ariko igiciro cyayo ngo ntigikanganye cyane ukurikije uko ibiciro by’amazu byifashe muri rusange muri iki gihe.

Vedaste Nshimiyimana, Umunyambabanga Nshingwabikorwa w’Akarere ka Huye ati “Amwe yubatse ku buryo ari ane ateranye imigongo (four in one), andi yubatse ku buryo ari abiri(two in one) ateranye imigongo bitewe n’ibibanza yubatsemo.”

Kuba aya mazu ateye ku buryo ateranye imigongo bituma ahenduka kuko hari inkuta asangiye. Gitifu Nshimiyimana ati “Nk’abiri ateranye imigongo azarangira atwaye miliyoni 17 n’ibihumbi bisaga Magana atatu, ubariyemo n’imisoro. Buri nzu muri ebyiri kandi igizwe n’ibyumba bitatu hamwe na salo, igikoni, ubwogero n’umusarane.”

Amazu ateye ku buryo ari ane ateranye umugongo yo,buri yose igizwe n’ibyumba bitatu, salo, umusarane n’igikoni, kandi buri yose izatwara miliyoni zigera 39 n’ibihumbi bisaga 200.

Kugeza ubu ntiharemezwa igiciro cy’aya mazu mu gihe azaba amaze kuzura, ariko Gitifu Nshimiyimana avuga ko bashobora kuzayatanga ku giciro yubatsweho, hatabariyemo imisoro.

Aya mazu rero ngo yagenewe ahanini abakozi ba Leta batabasha kwiyubakira mu buryo buboroheye. Na none ariko, ngoni n’icyitegererezo cy’uko abantu bashobora gufatanya bakubaka bitabahenze kuko hari inkuta inzu za bozibazihuriyeho.

Ngo yubatswe haherewe kuri miliyoni 157 akarere kahawe mu rwego rwo guteza imbere imiturire. Mu mwaka utaha, ngo Akarere ka Huye kazahabwa izindimiriyoni 250 zo kubaka amazu nk’aya mu yindi midugudu yo mu nkengero z’umujyi wa Butare.

Ngo haherewe kuri izi miliyoni 250 ndetse no kuzindi zizava mu mazu 16 ari kubakwa i Ruhashya, hazubakwa andi mazu agenewe ingo 32 mu mudugudu wa Gitwa ho mu Murenge waTumba ndetse no mu Mudugu wa Gatobotobo ho mu Murengewa Mbazi.

Marie Claire Joyeuse