Tariki ya 05 Werurwe 2015, nibwo uwari perezida w’Inama Njyanama y’Akarere ka Ruhango yashyikirije ibaruwa y’ubwegure bwe inama njyanama y’Akarere ka Ruhango ayisaba ko yakwegura ku murimo y’ubujyanama.

Aha Gakuba yari amaze kwemererwa kwegura.

Akimara kwemererwa ubwegure bwe, Gakuba yatangaje ko kwegura kwe bitewe n’akazi asanzwe akora mu kigo cy’igihugu gishinzwe ubuzima (RBC), kuko muri iki kigo hagaragayemo ikibazo cy’imicungire mibi y’amafaranga n’ubu bigikurikiranwa.

Gakuba avuga ko urwego rwa Perezida w’Inama Njyanama ari urwego rw’ubuvugizi ku baturage, bityo agasanga atari kubibangikanya n’ibibazo afite, akaba yarahisemo kwegura ku mpamvu ze bwite, ariko akaba yizeza ko nk’umunyarwanda ukunda u Rwanda, azakomeza kuba hafi y’abo bakoranaga.

Inama Njyanama idasanzwe yemeye ubwegure bw’uwari Perezida wabo.

Akomeza asaba abaturage bari baramutumye kumva ko kwegura kwe nta gikuba gicitse.

Ubwegure bw’uwari umuyobozi w’Inama Njyanama y’Akarere ka Ruhango bwemewe nyuma y’umunsi umwe uwari umunyamabanga nshingwabikorwa w’Umurenge wa Mbuye, Bihezande Idrissa nawe yeguye, akaba ari nawo Gakuba yiyamamarijemo ubwo yagirwaga umujyanama mu karere, akaza no kugirirwa icyizere cyo kuyiyobora.

Didier Gakuba yari amaze imyaka ine ari Perezida w’inama njyanama y’Akarere ka Ruhango.

Gakuba atangaza ko kwegurira rimwe n’umunyamabanga nshingwabikorwa w’umurenge yiyamamarijemo ntaho bihuriye no kwegura kwe, kuko we atigeze anabimenya ko uyu munyamabanga nshingwabikorwa yeguye.

Vis Perezida w’inama Njyanama y’aka karere, Kagabo Mansuet, ari nawe wayoboye inama yo kwemera ubwegure bw’uwari perezida, yavuze ko ubu komisiyo y’amatora ariyo igiye gutegura amatora y’uzasimbura Gakuba weguye.

Eric Muvara