Mu kiganiro n’abanyamakuru cyabereye ku cyicaro cy’ikipe ya APR FC ku Kimihurura ku wa gatatu tariki ya 25 Werurwe 2015, umunyamabaganga mukuru w’ikipe ya APR FC, Kalisa Adolphe uzwi ku izina rya Camarade yatangaje ko n’ubusanzwe muri APR FC batajya bihanganira imyitwarire mibi iyo ariyo yose, ari nayo mpamvu bategereje ibizava mu iperereza ngo bafate umwanzuro.

Kalisa avuga ko n’ubusanzwe batajya bihanganira imyitwarire mibi.

Ati “Muri APR Fc ntitujya twihanganira imyitwarire mibi, uwaba yaragize uruhare mu mvururu zabereye i Rusizi agomba guhanwa, gusa ntituzahubuka tuzabanza twige kuri raporo y’abari baduhagarariye kuri uriya mukino”.

Yakomeje agira ati “Umubitsi wacu yari ahari kandi yaduhaye raporo, tuzategereza ibizava mu iperereza haba ku ruhande rw’ikipe y’APR FC haba no ku rwego rwa FERWAFA, ibizavamo nibwo tuzamenya imyanzuro tuzafata”.

Muri iki kiganiro kandi hagarutswe ku kibazo cy’umutoza mukuru w’ikipe, aho byari bimaze iminsi byibazwa niba ari Mashami cyangwa Dusan Dule, gusa Kalisa yatangaje ko mu nama iheruka guhuza abayobozi b’ikipe ya APR FC bemeje ko Dusan Dule ariwe mutoza mukuru akungirizwa na Mashami Vincent.

Dusan wagizwe umutoza mukuru.

Biteganijwe ko mu mpera z’iki cyumweru aribwo akanama gashinzwe imyifatire mu ishyirahamwe ry’umupira w’amaguru mu Rwanda kazatangaza imyanzuro ku mvururu yabereye i Rusizi, nyuma yo gusuzuma raporo y’abasifuzi ndetse no kumva impande zirebwa n’icyo kibazo.

Sammy IMANISHIMWE