Abo bandi bafunganzwe ni Byaruhanga Anastase wari uhagarariye ikigo nderabuzima cya Mulindi na Agoronome Nyirareba Domitile, umuyobozi wa SACCO ya Rubaya, Umucungamari wa yo, ushinzwe inguzanyo muri iyo SACCO, n’abanyamabanga nshingwabikorwa babiri b’utugari.

Umunyamabanga nshingwabikorwa w’umurenge wa Kaniga, Jerome Ngendabanga, afunzwe akurikiranyweho kwiguriza amafaranga yagenewe gufasha abatishoboye.

Amakuru agera kuri Kigali Today avuga ko Ngendabanga bamurega kunyereza umutungo wa leta naho Byaruhanga we akaregwa ubuhemu, bitangazwa n’umwe mu babashije gusoma muri dosiye z’aba witwa Dusabe Enock.

Yavuze ko Ngendabanga na bagenzi be bibumbiye mu itsinda ryitwa “Agaciro k’ubuhinzi” bafata inguzanyo y’amafaranga ya VUP bayahingamo ingano.

Guhinga ingano byari uburyo bwo gushishikariza abaturage bo mu murenge wa Rubaya ubuhinzi bw’iki gihingwa, kuko bo batabyiyumvagamo ahubwo bashakaga guhinga amasak. Icyo gihe bahinze ahangana na Hegitare 20, nk’uko yabisobanuriwe na Ngendabanga.

Iguzanyo bafashe ya VUP barayishyuye yose, abagize iryo tsinda nabo bategereje kugurisha umusaruro bakuyemo muri ubwo buhinzi bwabo.

Umuvugizi wa polisi mu ntara y’Amajyaruguru, Hakizimana Andre, avuga ko umuyobozi w’umurenge n’abo bakozi bandi bafunganywe, batangiye gukorwaho iperereza baza gutabwa muriyombi tariki 2/3/2015.

Yavuze ko babataye muri yombi nyuma yo gusanga barihaye inguzanyo ya miliyoni zigera kuri zirindwi batemerewe kuko batari abagenerwabikorwa ba VUP.

Ibyaha baregwa biramutse bibahamye bahanishwa igifungo kuva ku myaka irindwi kugeza ku 10 n’ihazabu yikubye inshuro kuva kuri kabiri kugeza kuri gatanu y’amafaranga yanyerejwe, nk’uko biteganywa n’ingingo ya 325 y’igitabo cy’Amategeko ahana mu Rwanda.

Ernestine Musanabera