Njoroge w’imyaka 45 yafatiwe ku kibuga cy’indege cya Kigali i Kanombe yahishe iyi Cocaine mu masakoshi mashya, nk’uko CSP Céléstin Twahirwa, umuvugizi wa Polisi y’igihugu yabitangarije abanyamakuru kuwa gatanu tariki 30/01/2015.

Yagize ati “Tumaze kumenya amakuru ko yari mu nzira aza Polisi yamwegereye iramuvugisha bamwereka ko hari ibyo bakeka kuri we bashaka kumenya. Yari afite amasakoshi agera kuri atatu bayarebye bumva hari ibintu birimo biba ngombwa ko bayafungura”.

Yunzemo ati “Bayafunguye basanze harimo ibiro bibiri bya Cocaine atubwira ko yari agiye kunyura i Bujumbura ariko bishobora kuba ari uburyo bwo kujijisha kuko turacyakora iperereza”.

Uyu mugore avuga ko iyo Cocaine yari afite Atari iye ahubwo ko hari umuntu wamuhaye ayo masakoshi ngo ayamuhere inshuti ye iri muri Kenya. Gusa usesenguye ibyo yasobanuraga wumva harimo kunyuranya kwinshi, kuko we avuga ko yagiye muri Brazil kwivuza ariko akaba adashobora gusobanura ibitaro yivurizagaho cyangwa umuganga wamuvuraga.

CSP Twahirwa yasobanuye ko impamvu yemeza ko ari ukujijisha ku byo asobanura ari uko n’abandi batatu bafashe mu gihe cy’amezi atandatu ashize usanga bifite aho bihuriye. Yongeraho kandi ko bamaze no kumenya amayeri menshi bakoresha babifashijwemo n’imikoranire y’izindi Polisi z’ibihugu.

Polisi yemeza ko aramutse aburanishirijwe mu Rwanda agahamwa n’icyo cyaha yahanishwa igihano kiri hagati y’imyaka itandatu n’imyaka 10 y’igifungo n’ihazabu iri hagati ya miliyoni imwe kugera kuri miliyoni 10 z’amafaranga y’u Rwanda.

Polisi yatangaje ko izakomeza iperereza ifatanyije n’iy’u Burundi n’iya Kenya kugira ngo hamenyekane abandi bari bafatanyije.

Emmanuel N. Hitimana