Muri iyi nama y’umutekano bavuze ko abaturage bafite indangamuntu z’i Burundi bafashe mu buryo budasobanutse ngo babarirwa muri 20, bakaba baboneka cyane cyane mu murenge wa Muganza.

Abanyamabanga nshingwabikorwa b’imirenge ituriye ikibaya cya Bugarama cyane abafite imirenge ihana imbibi n’igihugu cy’uburundi basabwe kugenzura kugira ngo barebe niba nta bandi bafite ibyo byangombwa kugira ngo babyamburwe.

Mu gihe impamvu ituma aba baturage bajya gufata ibyangombwa i Burundi itaramenyekana, hari amakuru avuga ko abo banyarwanda bajya gufata ibyo byangombwa kugira ngo bazajye mu matora y’umukuru w’igihugu cy’u Burundi.

Iyi nama y’umutekano yari iyobowe n’umuyobozi w’Akarere wungirije ushinzwe imari n’iterambere ry’ubukungu, Kankindi Leoncie, yasabye abaturage bo mu Karere ka Rusizi kwigengesera mu ngendo bakorera muri Repubulika iharanira Demokarasi ya Kongo kuko umutekano waho utizewe kubera imyigaragambyo imaze iminsi ihabera.

Zimwe mu mpungenge zagaragajwe ku bajya guhahira muri icyo gihugu ni uko bashobora guhohoterwa, bityo bakaba basabwe kujya bajyayo ariko bafite amakenga kandi bakageragaza kujya bataha kare, ndetse n’ugize ikibazo akaba yabimenyesha hakiri kare kugira ngo harebwe uburyo yatabarizwa.

Musabwa Euphrem