Nyuma yo kubona ko umuco nk’uyu ngo utagaragara cyane mu mujyi wa Muhanga aho usanga buri mubyeyi yita ku bana be mu rugo gusa ariko abana bo ntibahure ngo bishime, ubuyobozi bw’iyi kipe ngo bwahise bufata icyemezo ko iki gikorwa kizajya gikorwa buri mwaka, maze abandi nabo bakahabonera urugero.

Guhuza abana no kubitaho mu minsi mikuru ngo bikwiye kuba ibya bose.

Umuyobozi wa Les Onze du Dimanche, Ntivuguruzwa Severin avuga ko iki gitekerezo cyaje ubwo bahuzaga abana bafite ababyeyi babo baba mu muryango ayoboye, ariko ubu bakaba baraguye amarembo n’abandi bana babikunze bagasabirwa uruhushya ku babyeyi babo maze bagahurizwa hamwe n’abandi.

Avuga ko aha ari naho abana basobanurirwa neza iby’iminsi mikuru ngo bayimenye ndetse bakanafashwa kwishima mu mikino itandukanye, hamwe no kumenyana. Mu busabane aba bana bagaragaza ibyishimo baterwa n’ibyo baba bateguriwe, kandi bagakangurirwa no kurangwa n’iyindi myifatire y’ikinyabupfura.

Imikino itandukanye ishimisha abana iyo bari kumwe.

Gasirabo Peter, Umwe mu bashinzwe gutegura umunsi mukuru w’abana muri les onze du dimanche avuga ko buri mwaka baha noheri abana basaga 100, ariko ngo iyi gahunda igitangira mu myaka 2 ishize ntibarengaga 30.

Avuga ko kimwe mu bituma abana bakomeza kwiyongera ari ubuhamya bwiza abana hamwe n’ababyeyi babo bitabiriye bagenda baha abandi. Ikindi kandi, ngo buri mwaka bagerageza kongeramo iby’ingenzi bituma abana bishima.

Abana basobanurirwa icyo iminsi mikuru isobanuye.

Bamwe mu babyeyi bazanye abana babo muri uwo munsi bishimira iki gikorwa, aho bavuga ko mbere batabihaga agaciro ariko ubu bakaba barafashe ingamba ko nta bana babo bazongera gucikanwa.

Iki gikorwa ngo gikwiye kwigirwaho n’abandi babyeyi bavugwaho kwinezeza cyane ariko abana babo ntibitabweho.

Abana bagira ubusabane bakanasangira amafunguro.

Ernest Kalinganire