Ayo mahugurwa y’iminsi itatu yaberaga mu Ishuri Rikuru ry’Amahoro (Rwanda Peace Academy) rya Rwanda Defense Force (RDF) yasojwe kuri uyu wa gatanu tariki 19/12/2014. Col. Jill Rutaremara uyobora iryo shuri yavuze ko mu guhugura abantu, kugira ubumenyi gusa bidahagije ugomba no kuba usobanukiwe uburyo wabutambutsamo.

Abahuguwe uko ari 10 bafata ifoto y’urwibutso n’abarimu ndetse n’abayobozi ba RPA.

Col. Rutaremara aragira ati: “Kwigisha bisaba ibintu bibiri; ubumenyi bw’ibyo wigisha, icya kabiri bisaba kuba uzi uburyo bwo gutanga ubwo bumenyi (techniques) ni cyo amahugurwa yari abereyeho.”

Guhugura bisaba kumenya abantu bari mu mahugurwa abari bo n’umwanya ugomba gukoresha kugira ngo ubutumwa utambutsa bwumvikane hamwe no gukora ibishoboka byose abagukurikiye ntibasinzire; nk’uko Umuyobozi wa RPA yakomeje abishimangira.

Abitabiriye amahugurwa bakurikira umuhango wo gusoza.

Amahugurwa muri iki gihe akunda kwitabirwa n’abantu bakuze bafite ubumenyi n’ubunararibonye butandukanye, amahugurwa aba agamije kubakangura ku byo bazi. Ngo ni byiza ko amahugurwa aba umwanya wo kuganira abantu bagasangira ibyo bazi.

“Ntabwo muri iki gihe igishyizwe imbere ari ukwigisha abantu bakuze nk’aho ubarusha, uze ubabwire ubasigire iminota ibiri yo kubaza. Ni bya bindi bya kera ko ubarusha ubumenyi. Iki gihe abantu bafite uko bigisha, igihe kinini bagiharira kungurana ibitekerezo,” Col. Rutaremara.

Coll. Jill Rutaremara n’umukozi wa UNITAR bafatanyije gutegura amahugurwa.

Mu minsi itatu bari bamaze mu mahugurwa, abantu icumi bitabiriye amahugurwa barimo abagore bane bashimangira ko hari byinshi bungutse bizafasha mu kazi kabo.

Andrew Rucyahana ni umwe mu bitabiriye ayo mahugurwa, avuga ko yarushijeho gusobanukirwa uko amahugurwa atandukanye ategurwa, ibisabwa n’uko yegera abitabiriye amahugurwa kugira ngo arusheho gutanga umusaruro.

Andrew Rucyahana (umwe mu bitabiriye amahugurwa) ashyikirizwa inyemezabumenyi.

Kongerera ubumenyi abakozi ni inshingano ya Leta ndetse n’ibigo bitandukanye kugira ngo barusheho gutanga umusaruro, amahugurwa nk’aya y’abahugura kandi bashoboye ni inzira yo kugera ku musaruro wifuzwa mu nzego zitandukanye.

Nshimiyimana Leonard