Ibitego bya Sergio Ramos na Karim Benzema mu gice cya mbere ndetse n’ibya Gareth Bale na Isco mu gice cya kabiri, batumye ikipe ya Real Madrid igera ku mukino wa nyuma w’igikombe cy’isi cy’ama Club, nyuma yo kwitwara neza ku mukino yaraye ikiniye i Marrakesh muri Marooc.

Iyi ntsinzi si yo yonyine ikipe ya Carlo Ancelotti yakuye kuri uyu mugoroba, kuko gutsinda ibitego bine byahise bituma yuzuza ibitego 176 imaze gutsinda kuva tariki ya 01/01/2014 bityo ikuraho umuhigo wa FC Barcelone yo yatsinze 175 muri 2012.

Ibi bitego Real yatsinze harimo 110 yatsinze mu mikino 36 ya La Liga, 37 yatsinze mu mikino 13 ya Champions League, 22 mu mikino 9 ya Copa Del Rey, 2 mu mukino w’igikombe kiruta ibindi i Burayi, kimwe mu gikombe kiruta ibindi muri Espagne ndetse na bine yaraye itsinze mu gikombe cy’isi cy’ama Club.

Uyu musaruro ahanini ushingira ku butatu butagatifu bw’iyi kipe Bale-Benzema-Ronaldo, aho aba ubwabo batsinzemo 106 bonyine bingana na 60,2% y’ibitego byose Real Madrid yatsinze uyu mwaka. Kabuhariwe Cristiano Ronaldo yatsinze 56 uyu mwaka, Benzema atsinda 28 naho Bale atsinda 22.

Ikipe ya Real Madrid itegereje ikipe iri burokoke hagati ya San Lorenzo yo muri Argentine na Auckland yo muri New Zealand akaba ari yo bazahurira ku mukino wa nyuma kuwa gatandatu nawo uzakinirwa muri Marooc.

Real Madrid ku rundi ruhande yaraye itsinze umukino wayo wa 21 wikurikiranya aho isigaje imikino itatu ngo ibe yakuraho agahigo gafitwe n’ikipe ya Coritiba yo yatsinze 24.

Jah d’eau Dukuze