Igikorwa cyo kugurisha impano zaturutse mu Rwanda cyakozwe kuri wa Gatandatu tariki ya 06/12/2014 muri Resitora ya Bourbon Coffee hafi ya Harvard University mu mujyi wa Cambridge.

Uhagarariye inshuti z’uyu muryango, Todd Stewart Fry avuga ko bashimishijwe n’uko igikorwa bateguye cyagenze, kandi ko cyitabiriwe n’abantu benshi bakaba barashoboye kugura zimwe muri izi mpano zifite agaciro k’amadorari ya Amerika 1,600 (asaga miliyoni imwe y’amanyarwanda).

Todd avuga ko ibikorwa nk’ibi bizakomeza hagamijwe gukomeza gushakira inkunga RYHC.

Todd avuga ko iyi gahunda izakomeza aho nibura bateganya ko izi mpano zaturutse mu Rwanda zizagurishwa amafaranga ari hejuru y’amadorari ibihumbi bitatu (Miliyoni ebyiri zisaga z’amanyarwanda) azoherezwa mu muryango wa RYHC babereye inshuti.

Akomeza atangaza ko icyari kigamijwe cyane muri iri gurisha atari ugushaka amafaranga cyane, ahubwo ari ukongera umubare w’inshuti z’uyu muryango.

Biteganyijwe ko ibindi bikorwa byo kugurisha izi mpano bizakomeza mu mwaka utaha wa 2015, aho bazakangurira abantu benshi kwitabira ibi bikorwa bityo inkunga bagenera uyu muryango wa RYHC izarusheho kwiyongera, inzozi z’abawugize zirusheho kuba impamo.

Umuhango wo kugurisha impano zavuye mu Rwanda witabiriwe n’abantu benshi.

Rwanda Youth Healing Center ni umuryango watangiye mu mwaka 2004 mu karere ka Ruhango, ukaba ugizwe n’urubyiruko rwarokotse jenoside yakorewe abatutsi. Uyu muryango uvuga ko umaze kugera ku ntego wari ufite kuko urubyiruko ruwugize rwamaze gukira ibikomere rwasigiwe na jenoside.

Impano zagurishijwe zavuyemo amadorari ya Amerika 1600.

Barateganya kuzagurisha izindi mpano muri 2015.

Izi ni zimwe mu mpano zagurishwaga.

Aba ni urubyiruko rugize RYHC n’inshuti zabo zo muri Boston, USA.

Eric Muvara