Iyo ugeze muri uyu murenge, ubona abaturage batandukanye bambaye imyenda isa nabi ku buryo bukabije, ndetse no gukaraba ukabona babiheruka kera, mu birori bitandukanye ukabona baje basa uko ntacyo bibabwiye.

Ubusanzwe bizwi ko isuku ari isoko y’ubuzima gusa bamwe mu baturage batuye Umurenge wa Kinihira bavuga ko ikibazo cy’amikoro kibabera imbogamizi yo kugera ku isuku ikenewe, bityo ugasanga abaturage bacyugarijwe n’umwanda ukabije.

Iyo uganiriye na bamwe muri bo bavuga ko biterwa n’ubukene kuko batabona amafaranga yo kugura isabune ngo bisukure.

Nyamara ariko Habumukiza Jean Marie, utuye mu Mudugudu wa Murinzi, Akagari ka Rukina, Umurenge wa Kinihira wo mu karere ka Ruhango, avuga ko abaturage b’uyu murenge badakennye ahubwo ikibazo ari imyumvire mike.

Umuturage wanze gutangaza amazina ye avuga ko hakwiye kubaho ubukangura mbaga butandukanye bukozwe n’abayobozi, kugira ngo abaturage bacike ku kwambara nabi no kugira isuku nke muri rusange.

Umunyamabanga nshingwabikorwa w’ Umurenge wa Kinihira, Uwimana Ernest avuga ko n’ubwo ikibazo cy’ubukene gihari, isuku yagizwe umuco mu batuye Umurenge wa Kinihira kuko bakora ubukangurambaga mu nama zitandukanye, akavuga ko abagaragaza isuku nke bagaragara aribwo baba bagikika imirimo.

Ati “ubwo abo mwahuye ni uko byari mu masaha y’akazi karangira, kuko abaturage bacu isuku bayigize umuco ndetse turanabibashimira cyane pe”.

Umurenge wa Kinihira ni umwe mu mirenge 9 igeze akarere ka Ruhango, ukaba ugaragara ko ukiri inyuma mu iterambere kuko nta muriro uhaba cyangwa amazi meza.

Eric Muvara