Akarere ka Ngororero gatuwe n’ingo ibihumbi 74. Umuyobozi wako avuga ko mu mwaka wa 2008, ingo zari zifite amashanyarazi zari ibihumbi 2514 gusa zingana na 3,4%, ariko mu myaka 6 bakaba bamaze kuyageza kungo 12865, bingana na 17% aho umubare umaze kwikuba inshuro zirenga 5.

Kuba ubu ikigo cy’igihugu gishinzwe gukwirakwiza amashanyarazi gikomeje kugeza imiyoboro yayo mu byaro, bikaba ngo bitanga ikizere ko azagera hose mu gihe gito. Kugeza ubu, imirenge ya Bwira na Ndaro niyo yonyine itaragerwamo n’amashanyarazi mu mirenge 13 yose igize akarere.

Mu gihe ariko akarere n’abafatanyabikorwa bako batarabasha kugeza amashanyarazi hose mu karere, abaturage batuye ahagejejwe imiyoboro bakaba basabwa kugira uruhare mu gukurura amashanyarazi kuko bidahenze.

Barasabwa kandi gufasha abagituye ahantu hatateganyirijwe guturwa, ko bakwimukira mu midugudu kuko ahenshi amashanyarazi yamaze kuhagezwa. Kimwe n’aba baturage, abayobozi b’utugari batarageza umuriro mu nyubako bakoreramo nabo bakaba basabwa kubyihutisha kugira ngo babera abaturage urugero rwiza.

Biteganyijwe ko mu mwaka wa 2017, mu Rwanda amashanyarazi azaba yaramaze gukwirakwizwa mu ngo ku kigero cya 70%. Umuyobozi w’akarere ka Ngororero we avuga ko hari ikizere ko iyi ntego izagerwaho mbere, bityo abaturage bakaba badakwiye kugira impungenge zo kubona amashanyarazi.

Mu rwego rwo gufasha abatuye ahatargezwa imiyoboro y’amashanyarazi kandi, abaturage bakaba basabwa kwitabira gukoresha ubundi buryo bwunganira amashanyarazi nka biyogazi, imirasire y’izuba ikwirakwizwa n’abantu batandukanye n’ibindi.

Ernest Kalinganire