Ubuyobozi bw’Umurenge wa Mwendo buvuga ko bwatangije iyi gahunda kugira ngo umuturage wese uzajya ugera ku biro ibyo aribyo byose ajye abasha kubona iri shyiga n’uburyo ryubakiyemo, bityo bimutere amatsiko yo kuribazaho byinshi adasobanukiwe ababihugukiye bamufashe.

Umukozi ushinzwe imibereho myiza y’abaturage mu Murenge wa Mwendo, Muragire Christophe, avuga ko iyi gahunda igiye kumara nk’amezi abiri arenga itangiye kandi ko babona ko yakoze ubukangurambaga buhagije kuko abaturage babagana baza kubasobanuza iby’iri shyiga ari benshi.

Ati “kuva aho twubakiye izi rondereza ku biro bitandukanye mu murenge wacu ubona ko abaturage bitabiriye kuzikoresha ari benshi, kuko araza yayibona akatubaza uko yabigenza, icyo gihe natwe duhita tumwohereza kwa Agoronome (ushinzwe ubuhinzi) akamufasha kumwereka aho azikura nawe akajya kuyubakira iwe”.

Uretse ubu buryo bukoreshwa bwo kubakira rondereza hirya no hino ku biro, uyu muyobozi anavuga ko banakoresha ubundi buryo bwo kubikangurira abaturage mu nama zitandukanye.

Asaba abaturage bataritabira gukoresha ubu buryo kwihutira kubukora kuko bubafasha mu iterambere ryabo harimo nko kurondereza inkwi, kubungabunga ibidukikije n’ibindi.

Eric Muvara