Uburayi: Chelsea, Barcelone na Real Madrid zikomeje umuvuduko wo gutsinda, Man-u yavuye muri Big Four

21-10-2014 - 10:00' | Ibitekerezo ( 1 )

Nyuma y’umunsi wa 8 wa Shampiyona y’igihugu cy’Ubwongereza, ikipe ya Chelsea ikomeje kwesa umuhigo wo kudatsindwa aho kugeza ubu mu mikino imaze gukina yanganyije umwe gusa indi yose irayitsinda. Ni nyuma yo gutsinda Crystal Palace 2-1 mu mpera z’icyumweru gishize.

Iyi kipe ya Mourinho ikomeje kwicara ku mwanya wa mbere muri Premier league n’amanota 22, mu gihe iyigwa mu ntege Manchester City ifite amanota 17 nyuma yo gutsinda Tottenham 4-1.

Fabregas yahesheje ikipe ye ya Chelsea insinzi ubwo yakinaga na Crystal Palace.

Nyuma y’aho ikipe ya Manchester United yari yaje mu makipe ane ya mbere mu Bwongereza, uyu mwanya ntiyawumazeho kabiri kuko yahise iwukurwaho nyuma yo kunganya na West Bromwich Albion 2-2. Ikipe ya Arsenal nayo ntibyayigendekeye neza kuko yanganije na Hull City 2-2.

Mu gihugu cya Espagne, ikipe ya Barcelona nayo iracyayoboye urutonde rwa Shampiyona kuko nta mukino n’umwe iratsindwa. Kugeza ubu mu mikino 8 imaze gukinwa, yanganije umwe indi yose irayitsinda.

Mu mpera z’icyumweru gishize FC Barcelona yatsinze Eibar 3-0, mukeba wayo Real Madrid nayo yari yanyagiye Levante ibitego 5-0 ikomeza kuza imbere mu manota, kuri ubu ikaba iri ku mwanya wa 3 n’amanota 18.

FC Barcelona ikomeje kuyobora la Liga nyuma yo gutsinda Eibar 3-0.

Atletico Madrid yo igeze ku mwanya wa 5 ku rutonde rwa shampiyona nyuma yo gutsinda Espagnol Barcelona 2-0.

Ku wa 25/10/2014, hategerejwe umukino ukomeje mu gihugu cya Espagne uzahuza FC Barcelone ndetse na Real Madrid. Mu gihe Real Madrid izaba iwutsinze ikazakomeza kotsa igitutu Barcelona ariko yawutsindwa Barcelona nayo ikaba ikomeje kuyereka igihandure.

Safari Viateur